Rokstu sagataveja: portals lakuga.lv

Ituo goda rudinī LTV1 teik ruodeita raidejuma “Dzirdi balsis ar Kārli Kazāku” ūtrei sezona, kuruos trešajā raidejumā catūrtdiņ, 15. novembrī, varēs nūsavērt dzīsminīka Kārļa Kazāka gasteišonu Ludzys pusē, kab īsaklauseitu tuos apleicīnis bolsūs, viestej raidejuma veiduotuoju publicātuo informaceja.

Raidejums “Dzirdi balsis ar Kārli Kazāku” pyrmū reizi pi TV skateituoju guoja 2017. goda septembrī, gastejūt Zīmeļlatgolā – Baļtinovā. Par raidejuma idejis rosšonūs Kazāks pyrma goda stuosteja: “Par latvīšu volūdys boguoteibom manī atbiļdeigs vydzemnīku i kūrzemnīki dzymtu asnis. I, pat nadūmojūt par tū, ka latgalīšu, sēļu voi tāmnīku kultura nav īspiejama i pagaistu, ka palyktu bez sovys skanis, es vīnkuorši grybu tuos sagiut. Ak jau, ka maņ ir vīgluok pīdzeivuot i pījimt pasauli sovuos dzīsmēs. Vysatycamuok, ka tys ari ir naapzynuots īmeslis, deļ kuo taišni itai raugu īsapazeit ar sovu volūdu.” Raidejuma pyrmajā sezonā Kārlis gasteja Baļtinovā, Dignuojā, Rucovā, Salacgrivā, Ondrupinē, Talsūs i Olyuksnā, bet itymā godā “Dzirdi balsis ar Kārli Kazāku” celi vad iz Iergemi, Aņci, Ludzu, Neretu, Rūjīnu i Alsungu.

Kotra raidejuma mierkis ir na viņ īsapazeit ar kotrā vītā runuotū volūdu i vītejūs mīlesteibu iz tū, bet kotrā vītā dzīsminīks rauga sacerēt i īraksteit dzīsmi. Pyrmuos sezonys raidejumu dzīsmis izskanēja ari koncertūs Reigā i Rēzeknē, taipat tyka izdūtys albumā ar taišni taidu nūsaukumu “Dzirdi balsis ar Kārli Kazāku”, kurs beja nomināts ari muzykys īrokstu goda bolvai “Zelta Mikrofons 2017” nominacejā “Tautys i pasauļa muzykys albums”. Pats Kārlis sovulaik sajieme latgalīšu kulturys goda bolvu “Boņuks 2014” nominacejā “Latgalīšu volūdys populariziešona”.

Raidejumā par Ludzu, kuru varēs nūsavērt 15. novembrī pusostoņūs vokora LTV1 Kārlis, pietejūt Ludzys apleicīnis volūdys skaniešonu, sasatiks gon ar “Latgalīšu Reps” puišim Ivo i Didzi, gon Līgu i Ēriku Kondrātim nu Ludzys Amatnīku centra, folklorys kūpu “Isnauda”, školuotuoju Vandu Žulinu i cytim.

Pyrma jaunuos sezonys vīneiguo raidejuma Latgolā, pīduovojam vēļreiz nūsaklauseit “Dzirdi balsis ar Kārli Kazāku” pyrmajā sezonā latgaliski saraksteituos dzīsmis:

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.