Rokstu sagataveja: portals lakuga.lv

Itūgod jau 40. reizi iz sasatikšonu aicynoj Latgolys Pūdnīku dīnu tradiceja, kurys pasuokumi īcarāti gon Latgolys Kulturviesturis muzejā, gon keramikys darbneicā “Mōldedži”, gon ari Lūznovys muižā.

Sastdiņ, 12. septembrī, pļkst. 12.00–13.00 sevkurs interesents aicynuots iz Latgolys Pūdnīku dīnu 2020 izstuodis atkluošonu Lūznovys muižys Kulturys škiunī.

Izstuodē pīsadola vairuok nakai 30 Latgolys pūdnīceibys meistari ar jaunuokajim darynuojumim. Svātku reizē aicynuoti ari meistari, kuri beiguši aktivū darbeibu. Vīnuvīt byus apsaverami vyrpuoti i lypynuoti, kruošni glazāti i niansem boguoti reducāti (t. s. malnuo keramika) kasdīnā lītojami i dekorativi trauki. Par gūdu Pūdnīku dīnu 40. godadīnai tiks eksponāta kūpeigi darynuota servize. Izstuodi kuplynoj kalieja Juoņa Ļubkys metalkolumi.