2011. gods febralī latgalīšu rokgrupa “Dabasu Durovys” sadarbeibā ar basgitaristu i komponistu Valdi Rundzānu ruoda sabīdreibai īrokstu “Dziesmiņa par izglābšanu”. Dzīsmi ar Ojāra Vācieša tekstu sakomponiejs V. Rundzāns 1982. godā.

Ideja par dzīsmes īrokstu roduos paguojušuo gods rudinī, piec tuo, kod “Dabasu Durovys” sadarbeibā ar V. Rundzānu pīsadaleja ar itū dzīsmi festivalā “Bildes” Jaunūs grupu i Biļžu veteranu koncertā, dūdūt jaunu skaniejumu “izgluobtajom vieja patmaļom, vacajam valnam, mīlesteibai”. “Dziesmiņa par izglābšanu” ir vīna nu pyrmajom dzīsmem legendaruos rokgrupys “Elpa” repertuarā.

Grupai “Dabasu Durovys”, kas dzīd latgalīšu volūdā, itei ir pyrmuo latvīšu literarajā volūdā īraksteituo dzīsme. Īrokstā pīsadaleja V.Rundzāns (basgitara, tausteni), Egils Kulmanis (bolss), Arnis Slobožaņins (bolss, gitarys), Aleksejs Loginovs (bungys), Viesturs Celms (saksofons). Īroksts taiseits A. Slobožaņina sātys studejā Daugpilī, dzīsmi miksieja i masterieja Edgars Skrāgis.

Pylnu rokstu meklejit i dzīsmes audioīrokstu nūsaklauseit varit portalā DELFI.LV