Ar Latgolys kulturys programmys atbolstu Latgolys kulturviesturis muzejs izstruoduojs jaunu interaktivu muzejpedagogiskū programu „24 stuņdis latgalīts” vacuokūs klašu školānim i studentim, kas jau suokuse ceļu pi apmaklātuojim, bet nu septembra plānavuota aktiva darbeiba kai Rēzeknis, tai vysys Latgolys školuos.

Nūdarbeibā izīts leidza latgalīša dorba i dzeivis ritmam vysys dīnys garumā, apsaverūt vysus četrus godalaikus, tys ir, teik ruodeits, kū konkretajā dīnys laikā dora latgalīši.

Golvanuos tradicejis, svātki i tml., ar kū teik īpazeistynuota auditoreja:

• Reita cielīņs, sasagataveišona dorbam, īšona struoduot;
• Maizis cepšonys tradicejis;
• Tolkys i tūs raksturojums, tolku bolsi;
• Pūdnīceibys tradiceja, sadzeivē lītuojamī keramikys prīškmati;
• Latgalīšu iedīņs, saimnīceibā izmontojamī trauki;
• Myuža gūdi (kuozys),
• Amatnīceibys tradicejis (ausšona, spriesšona, adeisšona, auklu veišona utml.),
• Večerinka;
• Čyguoni aba maskūs īšonys tradicejis Latgolā.

Nūdarbeiba nūteik latgalīšu volūdā, lai popularyzātu i veicynuotu latgalīšu volūdys lītuošonu jaunīšu vydā, vuicātu i motivātu tū apgiut taidus, kas latgalīšu volūdu kasdīnā nalītoj.

Lai nūdarbeibā nūdrūšynuotu školānim tik svareigū muzeja īpazeišonu i pīsaskaršonu praktiskom lītom, rūkā patureišonys breidi, nūdarbeibai vajadzeigajim kūka i muola prīkšmatim, kai tū paradz muzeja kruojuma nūsacejumi, sadarbeibā ar kūkamatnīku i pūdnīku, izgotovuoti atdarynuojumi (kūka prīkšmeti – maizis šuple, cyba, svīksta muorceis forma, sātive, nieši, kūka lizeikys; keramikys prīkšmatim – puorinīks, svilpaunīki, pīna pūds, muola bļūda) .

Saskare ar lītom muzejiskā vidē paleidzēs vairuot interesi par sova nūvoda vierteibom, pīvērst leluoku uzmaneibu vysam, kas apkuort i stimulēs dzeivuot, dorbojūtīs sovā regionā – Latgolā, sorgjūt lapnumu par tuo bogotū kulturviesturiskū montojumu i tū popularizejūt kasdīnys dzeivē.

Ineta Atpile-Jugane, projekta vadeituoja, LKM direktoris vītneica

Tekstu latgaliski puorlyka: Anna Zahare