Latgalīšu karūgs Imanta dīnā “Bahmatūs”

LaKuGa 14. Juļs, 2011. gods 1

Latgalīšu karūgs (zyls-bolts-zyls ar grifu iz sorkona vairūga) teik vaira lītuots kai Latgolys i latgalīšu simbols. 2011. gods 1. julī – Imanta dīnā latgalīšu karūgs tyka pacalts ari Baļtinovys nūvoda Bahmatūs.

Itymā dīnā, kūpā saeimūt dūmubīdrim, Slišanu dzymtys sātā „Bahmatūs” tyka pacalts pyrmais latgalīšu karūgs Baļtinovys nūvodā. Paceļūt karūgu, skaneja dzīsme „Pīmiņ, bruoļ!”, kas 20. godu symta 90-tūs godu suokumā bīžai tyka dzīduota kai Latgolys atmūdys himna.

Imanta dīnā Bahmatūs latgalīšu dzīsmes skanēja Da Gunchi (Gunta Rasima) gitarys i baļtinovīša – „Palādu” teatra muzykanta Aigara Keiša akordeona pavadejumā. Svinietuoju pulkā beja ari vysaidu latgalisku pasuokumu organizatori i bīdreibys „Latgolys Saeima” aktivi dareituoji- Juris Viļums jeb Jureits nu Dagdys nūvoda i Andris Slišāns nu Viļakys nūvoda.

Imants Slišāns soka „Sirsneigs paļdis!” sovim tyvajim, meilajim cylvākim i dūmubīdrim, kas beja kūpā itymā dīnā kai paceļūt latgalīšu karūgu, tai ari vāluok – dzīdūt pi guņkura.

Pīmiņ, bruoļ, pīmiņ, bruoļ,

Sovu Tāvu zemi – sovu Latgolu.

Celīs, bruoļ, celīs, bruoļ,

Myus’ Muorys zemē Dīvu gūdynoj.

Dzīdi, bruoļ, dzīdi, bruoļ,

Lai trešuo zvaigzne otkon speidēt suok.

/V., M. Muktupāveli/

Komentari slāgti.