Eisai par regionaluos volūdys statusu – deļ kuo tys vajadzeigs?

jureits 5. Augusts, 2011. gods Comments Off on Eisai par regionaluos volūdys statusu – deļ kuo tys vajadzeigs?
Latvejis pamatlykumā – Satversmē ir pasceits, ka Latvejis vaļsts volūda ir latvīšu volūda.

Latvīšu volūdai viesturiski ir izaveidovuš divejis literaruos tradicejis – tai sauktuo “latvīšu literaruo volūda” (1) i Latgolys latvīšu volūda (kas eistineibā ir sanuoka), kū myusu dīnuos mes saucam par latgalīšu volūdu (2).

Dīvamžāļ, myusu vaļstē nu Padūmu godim i vēļ agruokim laikim ir īaudzynuots, ka ir tikai vīna pareizuo latvīšu volūda – iz vydsdialekta bazis izveiduotuo “latvīšu literaruo volūda”.  Lai gon itais termins vaļsts lykumdūšonā pasaruoda cīš epizodiski, puorsvorā teik lītuoti termini “vaļsts volūda” i “latvīšu volūda” – kai jau augstuok mynāts – munupruot, tymā ītylpst ari latgalīšu volūda kai pylnvierteiga latvīšu volūdys daļa.

Nu Latvejis naatkareibys atjaunuošonys laika, mes pošu vaļstī vēļ tai i naasam īvuicejuši visim latvīšim saprast vīnam ūtra, latgalīšu i reizē Latgolys latvīšu (latgaļu piecteču) volūda teik vaļstī skaiteita par nazkū zamuoku, napylnvierteiguoku, publiskā telpā eisti nalaižamu itml.

Vairuoku godu garumā nav izadevs itū vaicuojumu paceļt politiķu dīnys kuorteibā, deļ tam tagad teik vuokti paroksti, lai tū beidzūt izdareitu. Tai kai ratais vairs tyc tam, ka latgalīšu volūda Latvejā varātu byut ar vīnaidom tīseibom kai ūtrais paveids – latvīšu literāruo volūda, tod kai vīns nu īspiejamajim rysynuojumim teik pīduovuots latgalīšu volūdai daškiert regionaluos volūdys statusu iz reiz lykumdūšonys leiminī atrunojūt, kaidys tīseibys ar tū tiks dūtys.

Pīvadumam (tī ir muni īsacejumi, bet var runuot ari par citim):

– Latvejis vaļstei pīderūšajim plašsazinis leidzeklim ir juonūdrūšynoj informaceja ari latgaliski – koč voi 5% apmārā nu vysa LTV i LR raidlaika (procentu varātu palelynuot, kod byus zynomi tautys skaiteišonys rezuļtati),

– Regionalajūs plašsazinis leidzekļūs juobyut atbolstam latgalīšu volūdys lītuošonai;

– Latvejis školuos vuiceit, ka latvīšu volūdai ir divejis rokstu tradicejis – latgalīšu volūdu ir obligati juovuica vysuos Latgolys školuos. Daži runoj tik par fakultativu, bet munupruot tys pīļaunams tikai suokuma stadijā, deļ tam ka iz prīšku myusu tautai ir obligati juozyna sova volūda!

– Latgalīšu volūdu juovuica jau bārnuduorzūs, kai ari pīaugušajim juodūd īspieja apgiut pareizraksteibys nūsacejumi itt.;

– Vysmoz Latgolys teritorijā latgalīšu volūdai juobyut tīseibom byut ari lītišķajā sferā bez jebkaidim īrūbežuojumim – nadreikst diskriminēt vīnu volūdys tradiceji attīceibā pret ūtru koč i popularuoku;

– Geografiskajim nūsaukumim Latgolys regionā juobyut tūs sanuokajā variantā, kai ari jaunajim nūsaukumim (nakustamī eipašumi, uzjāmumi, īlu nūsaukumi i.c.) juobyut pīejamim latgalīšu volūdā.

Golvonais, lai Latvejā byutu gūdeiga attīksme pret visim latvīšim (bez sevkurys diskriminacejis), naatkareigi nu tuo, kaidu volūdu jis lītoj.

Deļ tam aicynoju Tevi i Tovus rodus, draugus pasaraksteit: http://manabalss.lv/i/141

Paraleli teik dūmuots par īspieju vuokt parokstus ari iz papeira – ka ir kaidi zynuotuoji, kas zyna kai tys pareizai dorams, dūdit zinis: latgolyssaeima@gmail.com

Komentari slāgti.