Vaļuka jaunuokī dzeivuli speciali deļ LaKuGa.LV (pyrmpublicejums)
Latvejis Poezejis dīnu tyvumā – pyrmpubliciejums – treispadsmit dzejūļu cykls nu Vaļuka ituo vēļ napublicietuo aileņu kruojuma.
Valentins Lukaševičs
PĀDYS NAVĀ SVĀTYS
* * *
Sauleite reizi dīnā
Īspeid lūgā.
Tys taids moziņks
I rītumu pusē.
Durovys taišni
Iz molkys škiuni.
Bez guņs ustobā
Skrīn dabasūs dyumi.
* * *
Zam tylta pi Viļānu īlys
Naaug bārzi i prīdis.
Tikai peliejumi gar upi.
Tikai putekli nu ceļa.
Gaidu kaidu iz ritiņa.
Gaidu kaidu ar smaidu.
Pasarunuot. Atsavasaluot.
Vīglu sirdi tod iz sātu.
* * *
Plyks cylvāks nūkrits
Lynu teirumā,
Pipša pīneņš izteciejs
Iz bryunim orumim.
Palīs leits,
I izdeigs tī bārzs.
Cylvāks staiguos
Tam apleik,
Izūrbs caurumu,
Nūlaizs sulys.
Muns bārns,
Muns bārns.
* * *
Lelūs viļcīņūs vyss ir skaidrs.
Detaļuos nabyus nikod.
* * *
Zīma beja solta i gara.
Sunim īmete kliepeiti sīna.
Izsola uobeļneicys.
Ogūrči pogrobā sasola bucā.
Aiz guļbom bunduļs ar veinu.
Meitai kuozys piec nedelis.
Naprosu, naprosu breinumu.
* * *
A tu tik daudz nastruodoj.
Dabasu vaļsteibā pījem i tūs
Kuri guļ zuoleitē
I verās muokūņūs.
* * *
Plauktā atrodu gruomotu.
Storp lopom īlykta nauda.
Ostoni symti rubļu.
Beja sakruojuse bērem.
Bet bēris tai i nanūtyka.
Pazuda jei bez viests.
Beja aizguojuse ūguos.
Atroda skusteni kūkā.
* * *
Ar žogorim itymā zīmā
Sātu izkurynuot nasaīs.
* * *
Ir taidi momenti,
Kod gostūs atīt Klementi.
Nu Bašķu i Kivtu,
Nu Dronku solom.
Pareizuok sokūt –
Atbrauc ar laivu.
Pi manis datorā
Meklēt laimi.
* * *
Augusta naktī pi Rēzeknis azara
Zyrgi zvīdz i guņkuri dag.
Jau ūtrū nedeli te hazari
Dzīd, doncoj i gaļu cap.
Reit sasīs sīvītis aiz zyrgim.
Nūdadzynuos pādejuos sātys.
Izkaļss sorkonais iz bryunuo.
Izaugs terasēs soltuos mātrys.
Iz celim. Iz celim izleinu kolnā.
Meiluo Rēzekne… Meiluo Latgola…
Byus čyuskys nu vysom olom.
Vīna iz ūtrys gulēs sauleitē.
* * *
Blusu pylna ustoba.
Pa radeju Eltons Džons.
Kačs iz golda.
Zam golda sābru Juoņs.
Apsameizs kruoc.
A es īlīku salatus.
Gribīs rauduot, bet navā osoru.
Gribīs runuot, bet navā kam.
Spoveds
Grāku maņ kai teirumā akmiņu.
Līku tačkā i vadu iz sātu.
Jaunajam klāvam vajag stypru podmorovku.
Tī zyrgs maņ byus ar sudobra krēpem.
Bārnus sasādynuošu zalta rogovuos.
Braucit, i nasaverit atpakaļ…
Braucit, cikom ir gaišs…
* * *
Pajem i apsasiesti zīmys klusūs vokorūs
Iz divana ar latgalīšu gramatiku rūkuos.
Nu i kas ka pa radeju skaņ dzīsmis.
Nu i kas ka tu ar sīvu runoj i saprūti.
Nasabeist, izdori tū pyrmū reizi.
Tei var byut kuopņu ryume voi tubzaleta sīna.
Īskruopiešonai der kaida moneta voi atslāga.
Tev navā ni naudys, ni sātys?
Ar zūbim sakūd pierstu da ašņam.
Upis iudinī īroksti golvonūs vuordus.
Redzi, kai jī aiztak, aiztak iz jiuru.
Redzi, kai naeistī nūsleikst pi laipom.
Komentari