Pyušaminstrumentu orkestris “Rēzekne” svietej 20 darbeibys godu jubileju

LaKuGa 17. Februars, 2012. gods Comments Off on Pyušaminstrumentu orkestris “Rēzekne” svietej 20 darbeibys godu jubileju
Šudiņ, 17. februarī  18 stuņdēs vokorā Rēzeknis Kulturys nomā byus Pyušaminstrumentu orkestra „Rēzekne” 20 godu rodūšuos darbeibys jubileja koncerts.

Koncertā pīsadaleis: Pyušaminstrumentu orkestris „Rēzekne” i orkestra big-bends, dzīduotuoja Zane Pavlovska, trombonists Lauris Amantovs, Rēzeknis nūvoda jauktais kors „Ezerzeme” i J.Ivanova Rēzeknis muzykys vydsškolys jauktais kors.

Pyušaminstrumentu orkestris „Rēzekne” izaveiduots 1991. godā iz Rēzeknis piļsātys Kulturys noma Tautys pyutieju orkestra bazis i tys ir trešais profesionalais itaida veida kolektivs Latvejā leidz ar p/o „Rīga” i p/o „Daugava”.

Orkestris regulari pīsadola pasuocīņūs i koncertūs piļsātys, nūvoda i vaļsts mārūgā. Orkestra repertuarā sūpluok tradicionalai pyutieju orkestru muzykai skaņ ari vīgluo žanra i džeza muzyka. Naatjamama pyušaminstrumentu orkestra „Rēzekne” daļa ir big-bends, kura koncertprogramā ir slavanu komponistu džeza muzykys dorbi.

Koncerta nūslāgumā par gūdu svātku reizei 17 orkestra muziki par ilggadeju gūdpruoteigu, rodūšu i lobu dorbu sajims Rēzeknis piļsātys dūmis Atzineibys rokstus. Atzineibys roksti tiks pasnīgti orkestra muokslenīciskajam vadeituojam i golvonajam dirigentam Sergejam Sergejevam, orkestra dirigentam Juoņam Gruduļam i vēļ 15 orkestra muzikim.

Īejis moksa koncertā: 1,00 Ls.

Karteņa: Pyušaminstrumentu orkestris “Rēzekne”, foto nu Rēzeknis piļsātys dūmis arhiva

Komentari slāgti.