Atsavieršona iz LaLaDra sasatikšonu Rēzeknē

LaKuGa 11. Apreļs, 2012. gods Comments Off on Atsavieršona iz LaLaDra sasatikšonu Rēzeknē
Atsavieršona iz LaLaDra sasatikšonu Rēzeknē
Ar cereibu, ka pavasars vystik atīs, bīdreibys “Latgolys Studentu centrs” Rēzeknis birojs 3.apreļa vokorā reikuoja vysim tik labi zynomū literari muzykalū pasuokumu „LaLaDra” jeb „LAtgalīts LAtgalīšam DRAugs”. Pasuocīņs nūtyka Rēzeknis studentim draudzeigajā „Klondaikā”, tys puļcēja pīcus jaunus muokslinīkus i četrys reizis vaira skateituoju.

Itymā reizē temys beja saisteitys ar pavasara pīsaukšonu. Īdrūsynuot jaunūs talantus i aizsuokt pasuocīņi Rēzeknē beja atbraucs Jurs Viļums. Jis uzsvēre, ka „LaLaDra” ir pyrmais atspierīņa punkts lelajam liecīņam latgalīšu kulturys veiduošonā.

Pyrmuo sovu dzeju laseja myusu pošu LgSC bīdre Inga Zepa, ar tū izapeļneidama jiuru aplausu, bet piečuok lobū nūskaņuojumu uzturēja Rēzeknis Augstškolys studente Laura Kalvāne. Laura spieļuoja iz gitarys pošsacereitys dzīsmis, pylnys ar pavasara gaideišonu i mīlesteibu. Sovu talantu nasabeide izruodeit arī Juoņs Šaudiņš, na tikai losūt sovu dzeju, bet ari izstuostūt smīkleigus gadīņus iz dzeivis.

Skanēja gon dzeja, gon dzīsmis, bet LgSC jaunīšim ar tū viņ napītyka. Grybējuos puorbaudeit, cik attapeigi ir jaunī muokslinīki. Atjauteibys konkursūs uzvarēja Māreite Krasnobaja, kura arī turpynuoja pasuocīņa muokslinīciskū daļu ar sovu dzeju. Pasuocīņa oficialū daļu nūslēdze jaunuo i talanteiguo Karonhisake, kurai paleidzēja Jurs i Pīters.

Kotrs jaunais muokslinīks varēja izviļkt nu magiskuos kastis aukleņu, kuruos golā beja nazynoma bolva, kai ari sajēme pateiceibu par pīsadaleišonu.

 

Rēzeknis LgSC birojs

Kartenis – foto Inga Zepa


Komentari slāgti.