Rotko muzejā byus apsaverami vēļ diveji Marka Rotko originaldorbi

Rotko muzejā byus apsaverami vēļ diveji Marka Rotko originaldorbi

Rokstu sagataveja: portals lakuga.lv

Svietejūt Rotko muzeja 11. dzimšonys dīnu, pīktdiņ, 26. aprelī, 16.00 stuņdēs sūpluok pasauļslovonuo muokslinīka Marka Rotko originaldorbu ekspozicejai tiks atkluoti vēļ diveji originaldorbi, kai ari prezentāti jaunuokī muzeja izdūtī muokslys katalogi, informej muzeja puorstuove Inita Paegle.

Apreļs Rotko muzeja kalendarā vysod bejs svātku mieness. Pyrma 11 godu Daugovpiļs cītūksnī tyka atkluots Rotko muzejs (tūreiz – Rotko centrs) – daudzfunkcionala muokslys i kulturys instituceja, kas kardinali maineja piļsātys vaibstus, īzeimejūt Daugovpili kai strategisku vītzeimi Latvejis kulturkartē.  

Itūgod, svietejūt Rotko muzeja 11. godadīnu, sūpluok pasauļslovonuo muokslinīka Marka Rotko originaldorbu ekspozicejai, kurā apsaverama treis godu deponiejumā nūdūtu gleznu izlase nu muokslinīka bārnu privatkolekceju, tiks atkluoti vēļ diveji originaldorbi – muokslinīka meitys Keitas Rotko-Prizelys duovynuojums Rotko muzeja kruojumam, pasnāgts kulturvītys 10 godu jubilejis svineibuos pārnejuo gods pavasarī. Itī muokslys dorbi – autora agreimuo dailradis perioda zeimiejumi ūglis tehnikā – ir itūšaļt vīneigī Marka Rotko originaldorbi Latvejis muzeju kruojumā. Par vīnu nu itūs dorbu – “Bez nūsaukuma/sādūša sīvīte” – Rotko muzeja kruojuma departamenta vadeituoja Zane Melāne portalam lakuga.lv pārņ stuosteja myusu kruojumu duorgumu rubrikā.

Marks Rotko “Bez nūsaukuma / sādūša sīvīte” (1933-1934). Grafits, Bond papeirs, 30.5 x 21.6 cmKarteņa nu Rotko muzeja kruojuma

Papyldus originaldorbu atkluošonai pasuokumā tiks prezentāti ari aktualuos izstuožu sezonys katalogi. Tūs vydā ir izcyluos muokslineicys, spūdrys latvīšu laikmeteiguos gleznīceibys puorstuovis Frančeskys Kirkis katalogs personalizstuodei “Bastions”, Latgolys regiona muokslinīku konkursa izstuodis “Lelgobolu klusumā” tvārums ar 47 muokslinīku dorbim i Purvīša bolvys 2024 nominanta Romāna Korovina personalizstuodis “Nūmiersim kūpā” katalogs. Vaira par itom izstuodem var skaiteit portala lakuga.lv reportažā.

26. aprelī nu 16.00 stuņžu Rotko muzeja pastuoveiguo ekspoziceja ar kruojuma izstuodi i Marka Rotko originalim apsaverama bez moksys.

Galerejā: Latgolys regiona muokslinīku konkursa izstuode “Lelgobolu klusumā”. Foto: Amanda Anusāne/portals lakuga.lv


Print Friendly, PDF & Email

Kalenders

May
30
Cat
13:00 Daugovpiļs piļsātys svātki @ Daugovpiļs
Daugovpiļs piļsātys svātki @ Daugovpiļs
May 30 @ 13:00 – Jun 2 @ 19:00
Nu 31. maja da 2. juņa Daugovpiļs piļsāta svieteis sovu 749. dzimšonys dīnu, aicynojūt daugovpilīšus i gostus iz kūpeigom svineibom – piļsātys svātkim „Mana pils – Daugavpils!”. Treis dīnu garumā byus vareiba baudeit vysaidys koncertprogramys,[...]
13:00 Sasatikšona ar Juri Cybuli @ Reigys Centraluos bibliotekys Grīziņkolna filialbiblioteka
Sasatikšona ar Juri Cybuli @ Reigys Centraluos bibliotekys Grīziņkolna filialbiblioteka
May 30 @ 13:00 – 14:30
30. majā 13.00 stuņdēs RCB Grīziņkolna filialbiblioteka (Alauksta īlā 10) aicynoj iz sasatikšonu ar Juri Cybuli. Jurs Cybuļs ir volūdnīks, tulkuotuojs, publicists i školuotuojs, kurs vaira nakai 40 godu pietej i kolekcionej ābecis. Jurs Cybuļs[...]