Zivs dzīsme bārnu muokslys dorbūs

LaKuGa 17. Apreļs, 2012. gods Comments Off on Zivs dzīsme bārnu muokslys dorbūs
Zivs dzīsme bārnu muokslys dorbūs
Vēļ tik puora dīnu da 21. apreļam Latgolys Kulturviesturis muzejā (3. stuova zalā, Atbreivuošonys alejā 102, Rēzeknē) byus apsaverama bārnu muokslys dorbu izstuode „Zivs dzīsme” (Zivs dziesma). Rēzeknis Muokslys i dizaina vydsškolys Muokslys školys audziekni kotru godu atruoda sovus dorbus, kurymūs itymā godā „izskaņ” naparosta muzyka i tik cīši viereigam skateituojam byus dzieržama zivs dzīsme.

Muokslys školys vadeituojis Kristīnis Bindukys atsavieršona iz padareitū:

Kotru godu Rēzeknis Muokslys i dizaina vydsškolys Muokslys školā audziekni padora cīši daudz. Itymā godā Muokslys škola atsasauce Juoņa Ivanova Rēzeknis muzykys vydsškolys aicynuojumam paruodeit muzykys tematiku sovūs dorbūs. Itī ir gon kompozicejis dorbim, kurymūs vacuokūs kursu audziekni rauga paruodeit cylvāku nūsaceitā telpā, gon jaunuokūs kursu audziekņu dorbi, kurūs paruodeita dekorativa dažaidūs muzykys instrumentu forma. Audziekni ir raudziejuši nūdūt skateituojam ari nūskonu i sovys asociacejis par kotru muzykys instrumentu.

Školuotuojis Agritys Mazuris stuņdēs taiseiti gon vuiceibu prīškmata gleznuošonys dorbi, gon kompozicejis prīškmata aizdavumi – kolažys.

Ari 4. kalsis audziekņu zeimuošonys dorbu rezultati līcynoj par jūs centeibu i pedagoga prasmi virzeit vuiceibu procesu. Školuotuoja Ella Maslovska ar vacuokūs klašu audzieknim ir cantušīs apgiut akademiskuo zeimiejuma lykumus i sakareibys zeimojūt dažaidus pyušomūs instrumentus.

Vuiceibu prīškmata Dorbs materialā laikā muokslys školā struoduoja ar cīši dažaidim materialim. Pyrmā klasē tei beja papeira masa, ar kuru bārni struoduoja školuotuojis Lilijis Korklišys vadeibā.
Interesanta ir saleidzynuošona, kai godu nu gods mainuos školys audziekņu dorbi – nu cīši bierniškeigim, naivim leidz akademiski nūstruoduotim. Cīši pozitivys emocejis raisej pyrmuos klasis zeimiejumi, kurymūs školuotuoja Agrita Mazure aicynoj bārnus zeimuot sovu montu skaudzi ci audziekņa pašportretu.

Catūrtā klasē dorbs materialā ir daudzi dorba ītiļpeiguoks – teik taiseitys cīši interesantys drēbis lelis. Pasnīdziejis Natalejis Losānis vadeiba sašyutys gon lelis muzykantim, gon mūdis damys. Kai cīši praktiskys sataiseituos lītys ir drēbis apdrukys tehnikā rūtuotī krakli i kuleitis. Īdvasmu bārni stuņdēs pasasmāluši latvīšu tautys etnografiskūs rokstūt, interpretiejuši i puortaisejuši tūs, kab izmontuotu kai naparostu nūspīdumu iz sova krakla.

Pyrmuo klase školuotuojis Lūcejis Holstovys stuņdēs iz tradicionalū kači raudziejuse pasavērt cytom acim, nu 4. klasis aizdavums veiduošonys stuņdēs beja Roboteņš. Audziekņu pīeja dorbim bejuse fantazejis i radūšuma boguota – dorbūs izmontuotys i pūgys, i skryuvis, atsperis i pa vydam vysom itom tehniskom lītom audziekni roboteņam pasamanejušs dalikt ari rakstura.

Školuotuojis Ellys Maslovskys vadeibā muokslys školys 4. klasis audziekni aizdavumus pakuortuojuši vīnu ūtram – radejuši gon drēbis rokstu, zeimuojuši tārpu modeļus, kurūs piečuok īlykuši interesantā i dekorativā telpā. Spilgtys kolažys, daudzveideigys burtu fakturys, spēlis ar drēbis kopejom – tys vyss dasīn kotra skateituoja acs pi dorba.

Izstuodis dorbi ļaun giut īdvasmu ari tuos apmaklātuojim, kai ari var byut pamudynuojums školānim pīsavīnuot muokslys školys audziekņu puļceņam, kab īgiutu plašuokys zynuošonys par muokslu i lobuokys prasmis, kas varātu dzeivē nūderēt.

Muzeja dorba laiks:
ūtrdiņ, trešdiņ, catūrtdiņ, pīktdiņ – 10:00-17:00
sastdiņ – 10:00-16:00
svātdiņ, pyrmūdiņ – slāgts

Īejis moksa:
Školānim i studentim Ls 0,20;
pīaugušim Ls 0,40;
apvīnuotais bilets vysam muzeja Ls 0,30; Ls 0,70
pyrma školys vacuma bārnim – breiva;
muzejpedagogiskuo nūdarbeiba Ls 0,50;

 

Karteņuos izstuodis dorbi, foto A.Bondarenko

Komentari slāgti.