Juņa pošā vydā muzejā nūtyka Rēzeknis Augstškolys (RA) Izgleiteibys i dizaina fakultatis ūtruo leimiņa profesionaluos augstuokuos izgleiteibys bakalaura studeju programys „Interjera dizains” dimplomprojektu aizstuovieōsna. Vysleidz sasatraukušs beja gon studenti, gon pasnīdzieji – studentim beja juoruoda i juopamatoj sovs radūšus ideju risinuojums ustobu interjerūs, nu pedagogi viertieja i analizieja na viņ konkretūs diplomprojektus, ber ari jaunuos „Interjera dizains” programys pozivituos i vēļ izlobojamuos niansis.

Diplomprojektu aizstuoviešonys komisejā pīsadaleja kvalificāti profesionali – Rēzeknis piļsātys golvonuo arhitekte Lolita Čudare, Baltejis Starptautiskuos akademejis pasnīdzieja, dizaina savīneibys bīdre i arhitekte Nellija Dzīduotuoja, Rēzeknis muokslys i dizaina vydsškolys pedagogs dizaina sferā Aivars Pīgoznis, RA asociātais profesors Vladislavs Paurs, RA docente Aina Strode i sekretare Nellija Kivkucāne.

Aizastuoviešona guoja spraigi – vaicuojumi i diskusejis šaļtim balansieja iz satraukuma i emoceju škauderis, nu golarezultati prīcynoj – četru diplomdorbu projekti sajieme izcilu viertiejumu, puorejī – teicamu i vīns cīši lobu viertejumu. Ir skaidrs, ka pyrmajā bakalaura programys „Interjera dizains” izlaidumā vysi 11 beidzieji – Agnese Litkina, Larisa Kaimiņa, Dagnija Bernāne,  Elīna Kruste, Sarma Kazia, Līga Priedeslaipa, Kristīne Lubāne, Natālija Pavļukaite, Zaiga Pavlovska, Aigars Šķirmants i Rihards Štroms – byus pozitivom gandariejuma emocejom pīpiļdeiti.

Kotram interesentam niu ir īspieja izavielēt i pasyuteit sovu ustobu interjera īkuortuoumu pi kaida nu jaunajim specialistim. Kab saprostu, kurīs ir eistais, muzejs aicynoj apsaviert izstuodi. Beidzieji ir izstruoduojuši interjera idejis tūpūšajai Austrumlatvejis reģionaluo daudzfunkcionaluo centra kopejneicai, Rēzeknis nūvoda pošvaļdeibys foaje, RA kopejneicai, RA zeimuošonys, gleznuošonys i izstuožu ustobai, RA radūšūs dorbu studejai, Bolvu Vaļsts gimnazejis metodiskajam kabinetam, dizaineru studejai i vairuokom privatsātom.

Studeju programys „Interjera dizains” direktore Diāna Apele atzeist: „Dizaineri, kas izprūt gon īprīškejūs godu symtu montuojumu, gon myusdīnu interjera kai arhitekturys, dizaina tehnologeju i muokslys sintezis veiduošonuos princypus, ir i ari byus vajadzeigi dorba tiergā.”

Sagatavieja Maija Upeniece, Latgolys Kulturviesturis muzejs

Karteņuos:

1. Rihards Štroms prezentej diplomprojektu „Grafiskī elementi Austrumlatvejis regionaluo daudzfunkcionaluo centra kopejneicys interjera dizainā”, D. Apelis foto;
2. Agnese Litkina prezentej diplomprojektu „Stilu sinteze modernā privatsātys interjerā”. D.Apelis foto
3. RA bakalaura studiju programys „Interjera dizains” diplomandi, komiseja i pedagogi piec diplomprojektu aizstuoviešonys. Ē.Zlatkus foto