Grupai „Dabasu Durovys” izīt ūtrais muzykys albums

Grupai „Dabasu Durovys” izīt ūtrais muzykys albums

Daugovpilī, 2012. goda 11. oktobrī latgalīšu rokgrupa „Dabasu Durovys” prezentēs sovu ūtrū muzykys albumu „Styklu vītā skaņa”.

Muzykys albumā īkļautys 14 kompozicejis latgalīšu, latvīšu i angļu volūduos. Vairuokys dzīsmis jau ir pazeistamys klauseituojim kai singli – „Vacais mašinists”, „Grēku fani”, „Trešais pagarynuojums” i c. Albumā ir ari jaunys dzīsmis, kū klauseituoji izdzierdēs pyrmū reizi.

Dzīšmu muzykys i tekstu autors pa lelam ir grupys līders Arņs Slobožaņins. Vys tik albumā var atrast ari legendaruos Daugovpiļs grupys „Elpa” vīnu nu pyrmajom īstudātajom kompozicejom „Dziesmiņa par izglābšanu” (O. Vācieša teksts), kū „Dabasu Durovys” īrakstejuse sadarbeibā ar komponistu, basgitaristu Valdi Rundzānu piec veiksmeiguo kūpprojekta muzykys i muokslys festivalā „Bildes 2010”. Grupys daiļradē ir ari pazeistamu Latgolys dzejnīku ītekme – dzīsmei „Veikala dadzynuošona” izvālāts Valentina Lukaševiča teksts, nu dzīsmi „White” īdvesmojuse Ontona Slišāna dzeja.

Albuma nūsaukums „Styklu vītā skaņa” rodīs īsaspaidojūt nu idejis, ka pasauli var redzēt na tik vizuali, nu ari caur skonu.

Albums īraksteits Arņa Slobožaņina sātys studejā. Miksieja Armands Treilihs, Edgars Skrāģis, Nick Dawes. Albuma apstruodi padariejs Nicolas Dawes (Franceja).

Grupa „Dabasu Durovys” rodusīs 2006. goda suokuos Daugovpilī. Grupys pyrmais albums „Ļepetnīks” izguoja 2008. godā.

Albumu „Styklu vītā skaņa” izdūd „Latgolys Producentu Grupa”. Albuma informativī atbaļsteituoji ir Latgolys Radeja, Divu krostu radeja i portals Lakuga.lv.

Kab sasatiku ar sovim atbaļsteituojim, albuma „Styklu vītā skaņa” prezentacejis pasuokums byus Daugovpilī, Park hotel „Latgola” restoranā „Plaza” catūrtdiņ, 11. oktobrī 21:00.

Nūtikšonu kalendars

Dec
13
Cat
19:00 Gruomotys “Latgales pēdējie mohi... @ Reigā, Veru īlā 6
Gruomotys “Latgales pēdējie mohi... @ Reigā, Veru īlā 6
Dec 13 @ 19:00
Gruomotys "Latgales pēdējie mohikāņi" attaiseišona @  Reigā, Veru īlā 6 | Rīga | Latvija
Gruomota topuse vairuoku ekspediceju rezultatā, kuruos folkloriste i Zīdūņamuzeja pietneica Rūta Šmite kūpā ar antropologi i fotografi Elīnu Kursīti vuokušys cylvāku stuostus i īmyužynuojušys Latgolys mozcīmu īdzeivuotuojus fotografejuos. Gruomotu veidoj 52 stuosti, kurus papyldynoj vizuali boguoteigys[...]