Konfereņcis zynuotniskuo vadeituoja, asociātuo profesore Sanita Lazdiņa, par konfereņcis temys izvēli soka: „Globaluo lokalizaceja (angliski – glocalisation) ir termins, kū jau 20. gs. 80. godūs pīduovuoja japāņu ekonomisti. Ar tū tyka apzeimāta na tikai globalūs procesu ītekme iz regionu, bet ari lokalūs apstuokļu ci lokaluo konteksta ītekme iz globalizaceju. Tys zeimoj, ka na vysai pruoteigi voi lītdereiti ir ceineitīs pret angļu volūdu, tūmier tuos hegemoneju mes varim apturēt ar daudzveideiguoku regionalūs i nacionalūs volūdu lītuojumu gon realajā, gon virtualajā sferā. Voi kaids tulks var preteņdēt Briselē iz dorbu, zynūt tikai angļu volūdu? Cyts pīvadums Latgolys kontekstā byutum ar sūmu uotruos ādynuošonys restorana „Hesburger” attaiseišonu Rēzeknē. Myusim jau cīši patyktum kaida latgalīšu kukne ar blīnim ci palākajim ziernim. Bet, ka mes tū navarim ītekmēt, tod varbyut „Hesburger” Rēzeknē var daškiert regionalu specifiku ar kaidu Latgolā tipisku iedīni ci iedīņkarti latgaliski? Taidā veidā regionalais vysmoz drupeit ļaun apstuodynuot unifikacejis procesus.

Daudzveideigajā konfereņcis programmā sev saistūšys temys i idejis varēs rast školāni, studenti, školuotuoji, pošvaļdeibu vadeituoji i darbinīki, kuļturys īstuožu darbinīki, uzjiemieji, sabīdriskūs organizaceju puorstuovi, žurnalisti i cyti interesenti. Latgolys regiona pīviļceibu i ilgtspieju konfereņcē aktualizēs dažaidu zynuotņu pietnīki – ekonomisti, volūdnīki, literaturzynuotnīki, folkloristi, viesturnīki, filozofi, datorlingvisti, datorinženīri, geografi.

Konfereņcis suokums ir 8. novembrī 10 stuņdēs. Plašuoka pasuokuma programa i saistūšuo informaceja ir atrūnama ite (konfereņcis sātys lopa) ci Rēzeknis Augstškolys sātys lopā www.ru.lv.
Konfereņce teik reikuota kai divu lelu Rēzeknis Augstškolā realizātu projektu nūslāguma pasuokums. Eiropys Socialuo fonda (ESF) atbaļsteits projekts „,Teritoriālās identitātes lingvokulturoloģiskie un sociālekonomiskie aspekti Latgales reģiona attīstībā” teik eistynuots nu 2009. goda i beigsīs ituo goda 30. novembrī. Sovulaik Latvejis – Lītovys programys atbaļsteits projekts „HipiLatLit” tyka uzsuokts 2011. godā Rēzeknis Augstškolā sadarbeibā ar Kaunis Vītauta Dižuo Universitatis i Latvejis Universitatis Matematikys i informatikys instituta pietnīkim, lai divu godu laikā modernizātum humanitaruos izgleiteibys i pietnīceibys infrastrukturu Austrumlatvejā i Lītovā.

Sagatavieja Anna Briška

Karteņā – Rēzeknis skots, foto Ilze Sperga