Aicynoj īmyužynuot sātys vītys

LaKuGa 26. Novembris, 2012. gods 1,693
Aicynoj īmyužynuot sātys vītys
Latvejis kulturys montuojums ir daudzveideigs i tū veidoj cylvāka pamastī pādi, voi tys byutu pīraksteitais stuosts, nu paaudzis paaudzē nūdūtuo maizis recepte, gūdūs dzīduotuos dzīsmis voi vacuotāva izcaltuo sāta. Ar laiku daudzys lītys nūīt aizmiersteibā, vys tik myusu dīnu cylvāka aizdavums ir raudzeit tū vysu piec īspiejis leluokā daudzveideibā saglobuot cytom paaudem. Vīns nu veidim, kai tū padareit, ir īmyužynuot fotografejā.

Vidis aizsardzeibys Klubs, Latvejis Etnokulturys centrs, Atkluotuo sabīdriskuo fonda „Dobys ratumu kruotive” i Latvejis Nacionaluos bibliotekys Digitaluos bibliotekys „Zudusī Latvija” taiseituoji reikoj fotoakceju „Īmyužynoj sātys vītu”, ar mierki taiseit elektronisku datu bazi par vysom Latvejis sātys vītom.

Akcejā aicynoj īmyužynuot ākys, kas caltys leidz 1940. godam. Var īmyužynuot ari piečuokūs godūs caltuos, nu teik aicynuots leluoku viereibu dagrīzt da Ūtrajam pasauļa karam caltajom. Var fiksēt ari tuos sātu vītys, kurys piļneibā nav sasaglobuojušys, ir palykušys tik drupys. Taipat aicynoj pīvērst viereibu ari cytim interesantim objektim – kaļķu ceplim, vacim tiltenim, vacūs ceļu vītom i tml.

Sātys vītys fiksiešonai vajadzeigi 30 – 100 kadri, atkareibā nu plateibys i āku skaita. Fiksejūt sātys vītu ir svareigi pīfiksēt vysu īspiejamū informaceju par ākys apleicīni, konstrukcejis, byuvdetalis i cytys niansis. Juosataisa sātys kūpskots nu vairuokim skotu punktim, kotru sātu juonūbiļdej nu vysim 4 pakšim, atseviški juopīfiksej byuvdetalis (lūgi, durovys, engis, jumtu dekori i tt.). Ka īspiejams, var fiksēt ari īšktelpys (gadejumūs, ka eipašnīks pīkreit, voi ari, ja sāta ir pamasta i izdemolāta). Ka ir īspieja, var ari sataiseit sātys vītys shematiskū planu. Īsyuteit var na tikai myusu dīnu kartenis, bet ari nu senejim laikim. Tai pat aprokstā vālams nūruodeit viests par cylvākim, kas tī dzeivuojuši, nūstuostus par sātys vītu, vītvuordus i cyta veida nūdereigu informaceju. Aprokstā var nūruodeit ari viests par kulturaugim (augļu kūki, ūguluoji, seipuli i tt.), kas audzāti sātys vītā.

Ka ir vareiba, var nūruodeit vītys atsarošonu kartē voi pat GPS koordinatys.

Vālams arī dalikt sātu eipašnīku kontaktus, kab varātu ar jim sasazynuot i vīnuotīs par fotografeju izmontuošonu LNB digitaluos bibliotekys portālā „Zudusī Latvija”.

Akcejis organizatori car, ka jūs aicynuojumam atsasauks Latvejis bibliotekys, kurom varēs nūdūt savuoktū materialu. Itūšaļt Latgolys regiona savuoktū informaceju var nūdūt Rēzeknis centralajā bibliotekā.

Vaira informacejis par akceju var dabuot pi LNB puorstuovis Gintys Zalcmanis Tel.: 67287221 E-posts: ginta.zalcmane@lnb.lv.

Akcejis Organizatori lyudz veikt zīduojumus i eipaši datortehniku, kab varātu sataiseit sātys vītu datubazi. Šūbreid ir pīejams Vidis azisardzeibys kluba zīduojumu konts, kuram ir arī sabīdryskuo lobuma statuss. Zīdojūt juopīroksta nūruode „Nūvodpietnīceibys programai”. Var nūruodeit ari teritoreju, kurys izpētei nauda zīduota.

Rekviziti: Biedrība „Vides aizsardzības klubs”, 11.novembra krastmala 35, Rīga LV – 1966,  reģ. nr.40008003594, norēķinu konts: LV62UNLA0002002700198, SEB banka.

Vaira informacejis par akceju: http://vilakabiblio.wordpress.com/2012/11/16/piedalies-fotoakcija-iemuzini-majvietu/

Karteņa nu Vinetys Vilcānis arhiva

Komentari slāgti.