„Dzi, īsaklausi – ite dzīd, ite dzimst, ite dzierksteļoj! „GORS” idz dzeivis vīta na viņ vysam senejam, vierteigajam, kas dzeivoj Latgolā. Ite dzims i dzeivuos ari jaunais, nabejušais, aizraujūšais. Eistyns, skaists, radūšs „GORS”. Ite satecēs kultura, muoksla, idejis, nūtikšonys, jaunī, vacī, dzymtys, sovejī i praseitī, dzigys, dzīsmis, izlacūšys zvaigznis, senejis vierteibys. Kulturys centrs, koncertzals, kinu teatris, dzeivis vīta muokslenīkim, izstuožu vīta muokslai, restorams dzeivis baudeišonai, eksperimentim ar vysom maņom. Vīta, kur dun i dyuc. Latgolys atmūdys vīta. Dzi, dzi, celīs, atje, jiuti „GORU!”,” tai eisumā var izstuosteit „Latgolys viestnīceibys GORS” stuostu.

Atkluojūt i gūdā ceļūt jaunū vuordu, 1. decembrī Latgolys Kulturviesturis muzejā Rēzeknē beja sirsneiga svieteišona, kurymā pīsadaleja ari Kulturys ministrejis parlamentaruo sekretare Inese Laizāne, kas veļteja atzeineigus vuordus jaunajam zeimulam, sokūt, ka vuords „GORS” ir patīsi spieceigs. Nu Rēzeknis mērs Aleksandrs Bartaševičs nūruodeja, ka „GORS” paruoda centra byuteibu i ambicejis, kai ari līk cylvākim byut aktivim leidzdalinīkim, na viņ vāruotuoji. Svineibuos gostūs beja īsaroduši ari zeimula radeituoji nu zeimulu perekļa „MATKA” i dizaina kompanejis „Asketic”, sovu verseju par koncertzala vuordu i byuteibu stuosteja Raibīs Suņs (Oskars Orlovs), muzykalū baudejumu ar eipašu programu „Baroka zeilis” deve jauns kvartets, kurymā muzicej „GORS” orkestra dirigents Juoņs Stafeckis (kontrabass), Īva Salīte (klavesins), Agnese Kanneņa-Līpeņa (baroka skripka) i Ainis Zavackis (perkusejis). Par gordumim pasaryupieja kopejneicys „Mōls” i „Mozō Rogovka”, kas goldā cēle eistynus latgalīšu iedīņus, kai ari „Valmiermuižas alus”, kas siļdeja i sarunys raiseja ar korstolu.

„GORS” miseja ir kliut par Latgolys viestnīceibu – centru, kurymā vīnā vītā teik radeits i viesteits Latgolys stuosts.

Vaira par „GORS” skaiti: http://www.rezekne.lv/rezeknes-zinas/zina/_/rezeknes-zinas/-/daudzfunkcionalajam-centram-dots-jauns-vards-gors/

Sagatavieja Aija Ereņa, SIA “Austrumlatvijas koncertzāle” marketinga vadeituoja

Karteņuos – “GORS” vuorda dūšonys svieteišona Latgolys Kulturviesturis muzejā