Laimis šaļtenis/Māreitis Slišānis dzejūli

LaKuGa 15. Janvars, 2013. gods 1
Laimis šaļtenis/Māreitis Slišānis dzejūli
***
Es Tevi vadu caur
malnū tymsu
iz saulis gaismu…

Es tevi vadu nu
sasmokušuos telpys
iz puču smuorda pīpiļdeitū duorzu…

Es tevi vadu nu
dziļuo, malnuo pūra
iz skaidru olūteni…

Es Tevi vadu nu
Tymsuo, baisuo meža
iz boltūs bārzu birzeiti…

Es Tevi vadu nu
Aizmirstīnis iz
Palikšonu…

Es Tevi, meit, vadu
nu meilys
da mīlesteibai…

/Paļdis, TĒT!!! Vysod ar
Tevi blokus!/

 

VĪNDĪNEITE
Es grybātu byut
Vīndīneite…
Nu reita
pīdzimt…
Pa dīnu izaugt
pīaugt
uzplaukt
paruodeit
izjust
izdzeivuot
pīruodeit sevi
īprīcynuot
īpasazeit…
i vokorā
nūmiert
aizīt….

Bet ar nūsacejumu –
Ka tai kotru dīnu –
Vysu nu jauna –
Pīdzimt
Izaugt
Aizīt…
I dīnu, nu dīnys…..

 

***
Atver munys acs vaļā
endžis čeikst
I krampeits nasatur cīt.

Varbyut pajem
Meža zemneicu zapti
I īeļļoj, i nu šokoladis konfektem
Ar jogurta piļdejumu
Sataisi krampi
Ar kū aizviert cīt munys zaļuos sveču līsmu acs

Vēļ pajem sauju
Moltūs casnagu
Ar piparkūku glazuru
I sataisi viertenis, lai garum
Guojieji var pasmaideit
Kai ari atbaideit…
KALADŌ!!

 

***
Laime pasakuore
rudiņa nūkruosuotejā
sorkonejā kļovu lopā
auški, auški golūtnē,
kuru rudiņa viejs aijuoja
dzīduodams
aijā žūžū luoča bārni
ik pa breiteņam vuordus
sajaukdams…

Laime karojuos
gondreiž pošā golūtnē
i nazynkai aizdūmeigi smaida
carādama, ka nivīns jū
napamaneis i nanūraus
kai tuorpainū, īpuvušū
uobulu i
naīmess cyuku sumozgu
spanī…

Es radzu tū laimi,
nui, radzu, pīmīdzu
ar aci, uzsaucu –
es radzu tevi,
Bet naspieļoj ar mani
pasliepis,
nasagryb maņ
šudiņ byut vodai…

Karteņā Māreite Slišāne

Komentari slāgti.