Kas ir nūslāpumainais režisors Teuvo Tulio (1912–2000), eistajā vuordā Teodors Tugajs, sūmu melodramu breinums ar latgalīša dvēseli? Dzims viļcīnī Reiga–Pīterburga, bierneibu pavadejs Latgolā, kur tyka saukts par Fedju; 10 godu vacumā puorsacieļs iz dzeivi Helsinkūs pi muotis, kur nu padsmitnīka godim suocs fiļmētīs māmajuos kinuos, piečuok pīsavierss kinu režejai. Tulio vysaktivuok struoduojs 20. godusymta 30.–50. godūs, režisiejs 16 akterkinys, vysvaira jutekliskys i kruošņys melodramys, kuruos nareši izspieļuoja „pavastuos i pamastuos” dramu – jaunys, naivys lauku mārgys sapynu par lelpiļsātu i atsamūsšonu nu sapyna, kreitūt grākā i pīdzeivojūt pierkamys sīvītis skorbū liktini. Piec pādejuos kinys Sensuela (1972), kuru cenzura pamateigi sagraiza i kritika ignorej, Tulio nūsaslādz nu sabīdreibys – nauzjem jaunys kinys, aizlīdz izruodeit vacuos, nasnīdz intervejis i naļaun sevi fotografēt. Juo kinu montuojums Sūmejā teik puorvārtāts i atjaunuots ostoņdesmitūs godu beiguos, kinu gordiežu aprynduos Tulio palīk par kulta režisoru, Aki Kaurismeki nūsauc jū par „sūmu režisoru Nr.1”, bet deveņdasmytajūs mes izzynojam, ka, izaruoda, sovdabeigais režisors ir myusu tautīts. Tai Teuvo Tulio palānom atsagrīž dzimtinē…

Gruomotu “Fedja. Teodors. Tulio” sastatejuse Kristīne Želve, izdevs apguods „Mansards”. Juopīzeimoj, ka naseņ pi skateituojim atguoja ari Kristīnis Želvis veiduotuo kina par Teuvo Tulio „Fedja”

Ziņu sagataveja: LaKuGa piec gruomotys izdevieju informacejis
Karteņa: apgadsmansards.lv