Vosorā tyka izdūts keramiķa i dzejnīka Voldemāra Vogula catūrtais dzejūļu kruojums – “Sirds bolss”. Ar autora atļuovi pīduovojam LaKuGys skaiteituojim drupeit īsavērt itamā gruomotā. Tekstā saglobuota autora originaluo raksteiba.

Mōls, tu dejōjūšs,
Tu aicynoj un tōli –
Dzeiveibas tu nesējs!
Tu dūd
un jam…
Dzeiveibu nes,
Dzīsmu un – nōvi.
Tu šyupoj, rodi.
Un jam.

***

Aiztecēja dīna.
Mēness,
Kai izdyluse
Putyna ūla.
Maņ draugs
Kaida dzērve,
Aizlauztu spōrnu,
Klīdz pūrā
Rudeneigā.

***

Naktīs moti tovi –
Buras vējā,
Sapņu tylts
Storp tevi
Un storp mani.
Kaut pakolnā es rūsūs,
Kur tevis nav,
Kur sorkons mōls
Še leigojās
Kai nīdre azarkrostā.
Munōs rūkōs
Mōls teik dzeivs –
Lyuk, teiksmu tylts
Storp tevi
Un storp mani.

***

Bogōts, kod vari
Prīcēt cytu
Ar dorbu.
Bogōts, kod vari
Prīcēt cytu
Ar vōrdu.

***

Acis – pleivurs naatsagts,
Acis – pumpurs naatvārts.
Acis – spīgeļs, attāls tovs,
Skūpsts, vēj nasajimts.
Acis – vakardīnas skumes,
Vīnatneigas naktis.
Acis – oka.
Myužu dzert.

***

Nūtici,
Ka ir svāts mīrs.
Jo namīrs roda vātras,
Lauž dzeiveibas.
Nūtici,
Ka ir svāts mīrs,
Kod zīdā īgulst
Saule.