“Trešō zvaigzne” nūsvietej 25 godu jubileju
25. janvarī Reigys latgalīši sasalaseja, lai svieteitu sovys bīdreibys “Trešō zvaigzne” 25 godu jubileju. Pasuokumā skanēja latgalīšu dzeja, dzīsmis, muzyka, nūtyka karteņu vieršonuos i tyka pīmynāts bejušais.
Bīdreibys bīdrus i gostus ar sovim prīšknasumim prīcynuoja Latgolys Studentu centra folklorys kūpa “Ceidari”, VEF Kulturys noma ansamblis “Olūteņš”, kai ari Gaigalovys pogosta kulturys noma amatīrteatris “Bykovīši”, kuri beja īsaroduši ar Danskovītis izruodi “Sīvysmuotis lobuo sirds”.
Bīdreibu jubilejā sveice i puorstuovi nu Itys Kozakevičys Latvejis Nacionalūs kulturys bīdreibu asociacejis, kurys paspuornī dorbojās ari “Trešō zvaigzne”, i Latgolys Studentu centra, sovus sveicīņus nakluotīnē syuteja ari Sibira latgalīši, kai ari dzejneica Emileja Kalvāne.
Taipat tyka pasaceits paļdis bīdreibys vadeituojai Laurai Mozgai par atbiļdeiguo omota uzajimšonu, bīdrus sveice ari “Trešōs zvaigznis” vacuokais dalinīks – 95 godus vacais Ontons Mortukāns, kura peitūs dorbus leidz ar cytu rūkdarbnīku veikumu varieja apsavērt izstuodē.
Pasuokumā, kuru vadeja “Trešōs zvaigznis” bīdri Lideja Leikuma i Alfons Šveds, tyka pīmynāti ari pādejūs pīcūs godūs myužeibā nūguojušī bīdri: Antonina Riņke, Virgineja Spriņdža, Johanna Cederštrēma, Monika Maklere, kai ari bīdreibys ilggadejuo vadeituoja Marta Jurdža.
Bīdreibys vadeituoja Laura Mozga
LgSC folklorys kūpa “Ceidari”
Amatīrteatris “Bykovīši”
Ansamblis “Olūteņš”
Ziņu sagataveja: LaKuGa
Kartenis: Edeite Husare
