Latgolys viestnīceibā GORS īskandynuos ekskluzivys digitaluos varganis

LaKuGa 28. Marts, 2014. gods Comments Off on Latgolys viestnīceibā GORS īskandynuos ekskluzivys digitaluos varganis
Latgolys viestnīceibā GORS īskandynuos ekskluzivys digitaluos varganis

Apreļa vydā Latgolys viestnīceiba GORS ar ekskluzivu digitalūs vargaņu īskandynuošonys koncertu pavērs jaunys īspiejis vokali instrumentalūs skaņdorbu īstudiešonai Latvejā. Pasasokūt nu Rēzeknis guojušuos varganistis Ivetys Apkalnys naatlaideibai i degsmei, ar Vaļsts Kulturkapitala fonda, uzjāmuma “Latvijas Valsts meži” i Rēzeknis piļsātys dūmis atbolstu īguoduotys digitaluos varganis “Johannus Ecclesia”.

Kai atzeist Rēzeknē dzymušuo varganiste Iveta Apkalna, myusu dīnuos vairs nav nivīna koncertzala-jaunbyuvis, kurā natyktu dūmuots par vargaņu byuvnīceibu, partū ka varganis ir cīši nūzeimeiga skotuvis i koncerta sastuovdaļa. Ar jaunūs vargaņu īskandynuošonu Latgolys viestnīceibā GORS ari Latveja beidzūt tiks pi pyrmuos taida leimeņa koncertskotuvis, īsūļojūt Eiropys i pasauļa koncertzalu apritē kai pastuoveigs koncertzals ar sovu instrumentu. Da šam Latvejā nav bejuse nivīna koncertskotuve ar varganem, tik kai izjāmumus zalim ar instrumentu var pīminēt Latvejis Universitatis Lelū aulu, kurys varganis dīvamžāļ jau vairuokus godus nav taidā tehniskā leimenī, kab tuos varātu spielēt, i ari koncertzalu “Ave Sol”, kur ari ir varganis, tok i zala, i vargaņu izmārs ir cīši mozs.

2013. goda Latgolys viestnīceibys GORS atkluošonys pasuokums I. Apkolnai ir raisejs vaicuojumu par koncertzala tuoluokū atteisteibu, i vargaņu byušona iz GORA skotuvis ruodejīs logisks turpynuojums. Jau suokumā beja skaidrs, cik finansiali apjūmeigs ir jaunu vargaņu byuvnīceibys projekts, partū alternativu vaicuošonys rezultātā ir izvālāts konkretais digitalūs vargaņu rysynuojums. Varganiste atzeimoj, ka digitaluos varganis nanūzeioj naeistys varganis, bet tik tū, ka naradzama ir īrostai skaistuo vargaņu stabuļu daļa. Skaņa teik radeita digitali – vargaņu stabuļu skaniejums ir īraksteits elektroniskajā formatā pošuos varganēs, kas reizē paradz skanis kvalitatis nasamaineišonu. Taipat namaineiga palīk ari poša varganista pīskuorīņa sajiuta, kluotyn vēļ publikai itei ir īspieja redzēt, nu kuo sastuov varganis: na tik nu vīnys, bet itūreiz nu treju klaviaturu, sūla i vysa puorejuo, kū ir īrosts redzēt vargaņu balkonā aba luftā. Varganis iz GORA skotuvis beja radzamys ari koncertzala atkluošonys koncertā, tok Latgolys viestnīceibys GORS Muokslinīciskuos i pasuokumu nūdalis vadeituoja Ilona Rupaine stuosta, ka tys gadejums instrumenta sarežgeituos pastateišonys dieļ bijs vīnreizejs pasuokums. Jaunuos varganis byus myusu dīnuos izplateits i finansiali samiereigs rysynuojums, kai bīžuok rast īspieju vargaņu muzykai skanēt ari koncertzalā Rēzeknē.

Koč ari jaunuos varganis juridiski pīderēs Juoņa Ivanova Rēzeknis muzykys vydsškolai, tūs sāta byus Latgolys viestnīceibā GORS. Jaunuo instrumenta atsarasšona koncertzalā piec I. Apkolnys dūmom pavērs na viņ plašys repertuara īspiejis, bet byus cīši svareiga pīredze jaunajim varganistim, kuri varēs trenēt i ruodeit praksē studeju procesā īvuiceitū. Tus ari nūzeimoj īspieju kruot koncertu pīredzi, uzastuojūt iz skotuvis, kas, kai atzeist Apkolna, ir cīši sarežgeits process, partū ka varganisti pīroduši byut nivīnam naradzami, tok tod izpalīk vizualais kontakts ar publiku, kas ir naatjemama koncertvarganistu uzastuošonys sastuovdaļa. Beidzūt ari publika varēs muokslinīku redzēt i pīdzeivuot tyvumā varganista emocionalū attīksmi pret instrumentu, spēlis tehniku, kusteibys – vysu tū, kas da šam bejs līgts. Taipat jaunais instruments nuokūtnē pavērs plašuokys īspiejas reikuot starptautiskus pasuokumus, vargaņu festivalu, reikuot pasuokumus, kurūs byutu īsaisteits orkestris i varganis voi varganis i kors – vysaiduos kombinacejuos. Akademiskuos muzykys īspiejameibys lūks ar itū nūtykumu tiks īvāruojami palelynuots.

Latgolys viestnīceibā GORS niu atsarass Nīderlandis digitalūs vargaņu byuvnīceibys uzjāmuma “Johannus” instruments “Johannus Ecclesia”. Apmāram 27 000 eiro vārtuo instrumenta īguode pavērs Latvejā jaunys da šam varbyut nabejušys īspiejis vokali instrumentalūs skaņdorbu īstudiešonai.

Instruments ir izveiduots vīnā eksemplārā, partū ka standarta vargaņu modeļs papyldynuots ar papyldu īspiejom, kas svareigys myusu dīnu koncertvarganistam.

Pasauļslavanajai varganistei jaunuo instrumenta īskandynuošana byus lels pagūdynuojums i saviļņojūšs nūtykums. 15. apreļa koncertā varganiste spielēs i solo, i kūpā ar Rēzeknē jau labi īpazeitū kamerorkestri “Sinfonietta Rīga”. Apkolna cer, ka itam nūtykumam sekuos vēļ daudzi koncerti i ar jaunu, i videjuos, i vacuokuos paaudzis varganistu pīsadaleišonu. Cīši īspiejams, ka itys ir pirmais sūļs kaida leluoka varganistu konkursa nūrisei Latvejā, varbyut leidz ar eipašuo instrumenta īskandynuošonu GORS suoks jaunu varganistu kusteibu.

Vargaņu atkluošonys koncerts Latgolys viestnīceibā GORS nūtiks 15. aprelī 19 stuņdēs, beletus iz koncertu var īsaguoduot “Biļešu paradīzes” tierdznīceibys vītuos vysā Latvejā, tymā skaitā Latgolys viestnīceibā GORS Rēzeknē, Piļs ūļneicā 4. Koncerts tiks translēts Latvejis Radejis trešajā programā “Klasika”.

Ziņa sagataveita piec Latgolys viestnīceibys GORS dūtuos informacejis
Publicitatis karteņa

Komentari slāgti.