Jaunnedeļ – nu pīktdīnis, 13. juņa, leidz svātdīnei, 15. juņam, Sanktpīterburgā nūtiks jau trešais Latgolys kulturys festivals. Festivals teik reikuots pasasokūt veiksmeigai Latgolys Regiona atteisteibys agenturys i Latgolys Plānuošonys regiona sadarbeibai ar Latvejis Republikys generalkonsulatu Sanktpīterburgā i Sanktpīterburgys Kirova Centralū kulturys i atpyutys parku.

Popularizēt Latgolys turisma pīduovuojumu Sanktpīterburgys īdzeivuotuojim ar dzīsmem, dejom i rūtaļom dūsīs folklorys kolektivs “Ilža” nu Cyblys nūvoda i postfolklorys grupa “Rikši” nu Rēzeknis, sovukuort senejūs omotu tradicejis demonstrēs vaira nakai 30 vysaiduos nūzarēs struodojūšī omotnīki – keramiki, audiejis, kalieji, maizis cepieji, pinieji i cyti.

13. junī Latgolys dīnu ītvorūs pasuokums nūtiks Latvejis Republikys generalkonsulatā Sanktpīterburgā. Pījimšona konsulatā teik reikuota tūroperatorim, masu medeju puorstuovim, kai ari augstim gostim nu uorvaļstu puorstuovnīceibu i Sanktpīterburgys piļsātys administracejis.

Sovukuort 14. i 15. junī vysys dīnys garumā pasuokumi nūtiks Sanktpīterburgys Kirova vuordā nūsauktajā centralajā kulturys i atpyutys parkā, kur vysi interesenti tiks īpazeistynuoti ar Latgolys regiona folkloru, omotnīceibu, tradicejom i nacionalū kukni.

Karteņa: I.Račko