Annys Laicānis izstuode Rēzeknis Muokslys i dizaina vydsškolā

LaKuGa 10. Septembris, 2014. gods Comments Off on Annys Laicānis izstuode Rēzeknis Muokslys i dizaina vydsškolā
Annys Laicānis izstuode Rēzeknis Muokslys i dizaina vydsškolā

Leidz 5. oktobram Rēzeknis Muokslys i dizaina vydsškolys Boltajā zalā (Bazneicys īlā 34a) apsaverama Annys Laicānis gleznu izstuode “Green”.

Autore Anna Laicāne atzeist: “Gleznīceibā nav pīļaunama vīnaldzeiba. Ka muokslinīkam pošam ir bejs interesanti vaicuot, īraudzeit, izdzeivuot  i atrast, tod tys nūīs leidz skateituoju.

Tys, kas atsaspūguļoj munā gleznīceibā ir taišnā veidā saisteits ar dzeivi i dūmom par tū. Kotra izstuode līk drupeit apsastuot i izviertēt kaidu laika pūsmu. Prīca i breiveibys izjiuta rūnās tod, kod puorvari kaidu škiersli, kaidu nūsastyprynuojušūs sajiutu voi dūmu, kas, īspiejams, nimoz nav tevis radeita. Tei ir kai vēļ vīna lūga attaiseišona: “Oho, te ari speid saule, ir svaigs gaiss i dzīd putyni!” Tys vysod ir pastuoviejs, tik tu vierīs nu cyta skotpunkta. Tod, kod esi koč kū īsavuicejs, var ari nu koč kuo atsasaceit. Tai tu napaliksi vīnā vītā, nu dūsīs jaunā nazynomā ceļuojumā. Tik tukšā skryuzē var koč kū īlīt. Es raugu otkon i otkon vērtīs iz lītom nu jauna. Ceļuošona atraisa spieju redzēt pasauli cytuos kruosuos.”

Anna Laicāne dzymuse 1984. godā Vilekā. Vuicejusēs Rēzeknis Muokslys vydsškolā, Latvejis Muokslys akademejis Latgolys filialē i Latvejis Muokslys akademejis gleznīceibys nūdaļā. Pīsadalejuse izstuodēs Latvejā, Igaunejā, Boltkrīvejā, Turcejā, Dānejā. 2013. godā kūpā ar vēļ treis muokslineicom attaisejuse sovu galereju “Pop-up”.

Komentari slāgti.