“Upītes uobeļduorzs” jau pavysam dreiž!

LaKuGa 13. Septembris, 2014. gods 1

20. septembrī Vileks nūvoda Škilbanu pogosta Upeitē nūtiks tradicionalais mīlesteibys aiļu i dzīšmu festivals “Upītes Uobeļduorzs”, kas pi reizis ir ari vacuokais latgalīšu festivals pasaulī. Kai kotru godu, ari itūreiz iz Uobeļduorzu sasapuļcēs i zynomi, i jauni latgalīšu muziki, grupys i ailinīki.

Dzīduotuojus festivalā puorstuovēs “Ceidari”, “Gara taka”, “Rikši”, P.S. Sala, Zemnīks, Dainis Adijāns, Vinsents Kūkuojs, Unknown Artist, “Napruots”, “Dumpling”, “Šudīn Pīcūs”, “Weird Wednesdays”, “Gondreiž 10nīkā”, “Dabasu Durovys”, duets “Jurs, cīn. Čekša k-gs un es…” nu grupys “Bez PVN”, “Krampis”, kai ari festivala eipašais gosts Kārlis Kazāks.

Taipat “Upītes Uobeļduorzā” ar sovom ailem prīcynuos Juoņs Ryučāns, Mārīte Slišāne, Līga Rundāne, Ligija Purinaša, Dagneja Bramane, Zaiga Lāce, Māreite Bikovska, Raibīs, Zinaīda Logina i Valentins Lukaševičs.

Festivalā, kurs teik svieteits jau nu 2002. goda, itūreiz eipašs nūtykums byus festivala dalinīku uobeļduorza stateišona pi Upeitis Tautys noma, kab piec dažu godu festivalu varātu i klauseitīs, i ēst uobeļus nu “Upītes Uobeļduorza”.

Jaunums ari, ka itūgod tom grupom, kam nav izdūts albums, byus vareiba duovonā sajimt vīnys dzīsmis īrokstu profesionalā studejā. I, kas golvonais, ka stilam nav nūzeimis, svareigi, kab dzīsmis ītu nu sirds.

Uobelduorzs 2014 Web

Komentari slāgti.