Latgolys Kulturviesturis muzejā divejis jaunys izstuodis

LaKuGa 15. Septembris, 2014. gods Comments Off on Latgolys Kulturviesturis muzejā divejis jaunys izstuodis

Leidz 11. oktobram Latgolys Kulturviesturis muzejā (Atbreivuošonys alejā 102, Rēzeknē) apsaveramys divejis izstuodis. Mārteņa Gruduļa fotoizstuode “Baroka Muzykys dīnom Rēzeknē – 10” atkluoj skaistuokuos i emocionaluokuos saļtenis desmit godu garumā, bet ūtrajā izstuodē, zeimūla “Recycled.lv” tārpu kolekcejā “Cyta klasika”, apsaveramys suknis, bruņči, kopkys i vokora suknis, kas pagataveitys nu lītuotu veirīšu kraklu i mieteli-frakys nu biņdzuku, tūs nauordejūt, nagrīžūt i nakruosojūt.

Pyrms 10 godu, pasasokūt čellistis, rēzeknītis Ilzis Grudulis idejai i uzjiemeibai, tyka aizsuoktys kasgadejuos Baroka Muzykys dīnys Rēzeknē. Ar kotru godu tūs programa aicynoj klauseituojus atkluot jaunys emocejis baroka muzykys gaisūtnē i ļautīs muzykalajim pīdzeivuojumim, kū dūd senejuos muzykys skanis i izcili tuos izpiļdeituojmuokslinīki. Otkon gostūs teik gaideita I. Grudulis 2004. godā dybynuotuo baroka muzykys grupa “Kesselberg Ensemble” (Bāzele) i cyti baroka muzykys interpreti i nu Latvejis, i uorzemu.

Nu jau vairuokus godus paraleli baroka muzykys koncertim Latgolys Kulturviesturis muzejā teik reikuotys Baroka muzykys dīnom veļteitys izstuodis. Itūgod tys ir Mārteņa Gruduļa atskots iz Baroka muzykys dīnu Rēzeknē 10 godim fotosaļteņuos i atmiņuos.

Jubilejis godā natradicionali, nu kai kruošņu “garniejumu” Baroka muzykys dīnu 10 godu jubileja “tortam” – izstuodei – Latgolys Kulturviesturis muzejs sadarbeibā ar zeimūlu “Recycled.lv” pīduovoj tārpus nu kolekcejis “Cyta klasika”. “Recycled.lv” nu 2008. goda veidoj aksesuarus i apgierbu kolekcejis nu kraklu i biņdzuku, rodūt konceptualu dizainu skaistā formā i izvārstā intelektualā diapazonā. “Recycled.lv” filozofeja ir ūtrreiziejuo lītu puorstruode, restaurejūt sajiutys, laika goru i nūskaņu. Dzeivei atgrīzti teik na tik jau asūši, kvalitativi apgierbi, nu ari sīviškeibys, elegaņcis, grācejis i aristokratiskuma sajiuta, kū izbauda kotra sīvīte, apvalkūt itū apgierbu. Kolekceja “Cyta klasika” tyka demonstrēta “Baltic fashion catwalk 2013” Mercedes-Benz Fashion Week Berlīnē.
Kolekceju veidoj suknis nu kraklu.

Izstuodis attaiseitys:
Ūtardiņ, trešdiņ, catūrtdiņ, pīktdiņ 10.00-17.00
Sastdiņ 10.00-16.00
Svātdiņ, pyrmūdiņ – slāgta

Īīšonys moksa izstuodēs: školānim, studentim– 0,50 €, pīaugušajim– 0,80 €, pyrmsškolys vacuma bārnim – īīšona breiva

Karteņa: Mārteņš Grudulis – Baroks Latgolys viestnīceibā GORS 2013

Komentari slāgti.