Jaunnedeļ Bolvūs tiks atkluota jauna muzeja ekspoziceja

LaKuGa 27. Septembris, 2014. gods Comments Off on Jaunnedeļ Bolvūs tiks atkluota jauna muzeja ekspoziceja
Jaunnedeļ Bolvūs tiks atkluota jauna muzeja ekspoziceja

30. septembrī 15.00 oficiali tiks atkluota jauna pastuoveiguo ekspoziceja Bolvu Nūvoda muzejā, kas veļteita Zīmeļlatgolys namaterialajam kulturys montuojumam. Muzeja projekts realiziets Igaunejis – Latvejis – Krīvejis puorrūbežu sadarbeibys programys atbaļsteituo projekta “Saglabāt, lai nepazaudētu!” ītvorūs.

Pīcūs muzeja ekspoziceju zalūs myusdīneigā volūdā i izteiksmis veidūs teik atspūguļuotys vysaidys temys, tymā skaitā tradicionaluo muzyka, folklora, paražys, saļmys, maja dzīduojumi, cylvāku prasmis i cytys vītejuos vierteibys. Bolvu Nūvoda muzejā realiziets vīns nu golvonūs mierķu – izveiduot myusdīneigu muzeju, kurā tyktu izmontuoti vysaidi multimedeji i inovativys tehnologejis, kab jaunuo ekspoziceja byutu interesanta dažaidom paaudzem i interešu grupom.Muzeja interjera elementi (autentiski prīškmati, eksponati) ekspozicejā kombināti ar modernim muokslinīciskuos izteiksmis leidzeklim i tehnologejom – video projekcejis, novatorisks grafiskais dizains, skuorīņjiuteigūs ekranu programuos apsaverams plošs informativais materials. Jaunuo ekspoziceja ļaun uzrunuot vysaidu paaudžu cylvākus reizē, atraktivā veidā īpazeistynoj i nūdūd kulturys montuojumu nuokamajom paaudzem.

Muzeja ekspozicejis projekts realiziets sadarbeibā ar uzjāmumu Ddstudio, kurs jau 13 godus dorbojās dizaina projektu izstruodis i realizacejis jūmā i ir sajiems storptautisku atzineibu, veidojūt myusdīneigys muzeju ekspozicejis i Latvejā, i uorpus tuos.

Pasuokums Bolvūs nūtiks Eiropys sadarbeibys dīnu ītvorūs, kas suoksīs 12.00 Luoča duorzā ar akceju “Saglobuosim Dyžūzulu!”, kurys laikā nūtiks tolka i Bolvu dyžūzula sakņu segšona, Bolvu piļsātys školu audziekņu uzastuošona, kai ari dobys darbneicys “Dzeiveiba kūkā” i lasejums “Zynuotne – tys ir interesanti”, sadarbeibā ar Daugovpiļs Universitatis sistematiskuo biologejis instituta pietnīkim. Paradzāta ari tradicionaluos rudzu maizis degustaceja i puorrūbežu projekta meistardarbneicu rezultatā darynuotūs tautys tārpu prezentaceja.

 

Komentari slāgti.