Sasatikšona ar Inetu Atpili- Jugani Baļtinovā

LaKuGa 27. Septembris, 2014. gods Comments Off on Sasatikšona ar Inetu Atpili- Jugani Baļtinovā

Dzejis dīnys ir vīna nu latvīšu tautys kulturys tradicejom. 1965. gods latvīšu kulturā beja zeimeigs ar tū, ka taišni tod 100. dzimšonys dīnu byutu svietejs Rainis, kū var skaiteit par vīnu nu Dzejis dīnu izveiduošonys īmaslim. Jau nuokamajā godā – 1966. – aizasuoce Dzejis dīnu kasgadejuo reikuošona vysā Latvejā.

Ari Baļtinovys nūvods kotru godu īsasaista Dzejis dīnuos. Itūgod Baļtinovys vydsškolys Paaudžu centrā nūtyka sasatikšona ar dzejneicu, kulturys darbineicu Inetu Atpili-Jugani. Pasuokums īsasuoce ar Baļtinovys vydsškolys 12. klases tematiskū skeču. Pasuokuma vadeituojis – 12. klasis škoļneicys raudzeja puorlīcynuot klasis puišus, ka dzejis lasejumi i raksteišona nav veļteiga laika šķīsšona, nu vys nūdereiga, kluot vēļ eipaši nūderietu, gatavejūtīs latvīšu volūdys i literaturys eksamenim. Vadeituojis kluotynasūšūs īpazeistynuoja ar dzejneicys biografeju, sasnāgumim. Atmosferys radeišonai atskaņuoja grupys “Kardināls” dzīsmis, kuru tekstu autore ir Ineta. “Kab smaltūs idejis dzejūlim, nav vajadzeiga eipaša atmosfera. Svareigi ir vuordi, partū ka tī var izsaceit vysu, ar vuordu var padareit vysu. Gryušuok ir ar dzīsmem. Rokstūt tekstus, juojem vārā i lobskaneiba, i rindeņu garumi, atskanis,” tai atzyna Ineta.

Pasuokuma vadeituojis skaiteja dzejneicys populāruokūs dzejūļus latgalīšu volūdā. Ari školāni nu cytu klašu nūskaiteja sovus sagataveitūs dzejūļus. Iz vaicuojumu – kai roduos dūma raksteit latgaliski?- Ineta atbiļdēja: “Tys nabeja nikaids protests pret tū, ka teik raksteits tik latvīšu volūdā. Struodojūt pi projekta “Vīna vosora deļ vysu” suoču vaira lītuot latgalīšu volūdu. Nu jau asmu ceļā iz trešuos dzejis gruomotys izdūšonu. Pyrmūreiz gruomota byus latgalīšu volūdā.” Par sadarbeibu ar komponistim dzejneica soka: “Kotrs satyktais cylvāks dzeivē ir svareigs, kotram cylvākam ir sova lūma i nūzīme koč kaidu mierku sasnīgšonai.” Pasuokuma izskaņā Ineta nūskaiteja sovu vēļ napublicātū dzeju. Taipat jei pastuosteja, ka itūšaļt intensivai nūteik dorbs pi kaidys dokumentaluos kinys.

12. klasis puišim pasuokuma laikā beja aizdūts aizdavums – īsadvesmojūt nu sarunys ar dzejneicu, pošim pīraksteit sovus dzejūļus. Dzejūli saguoja humora pylni, kluot vēļ ar atskaņom. Ineta Atpile- Jugane atzineigi nūviertēja puišu snāgumu i nūvielēja kluotynasūšajim nasakautrēt i drūsai raksteit, atrast sovu rodūšū dzierksti i izapaust.

Teksts i kartenis: Madara Balode

Komentari slāgti.