Nu 9. leidz 12.oktobram ar septenim koncertim vaļsts austrumu pīrūbežys piļsātuos i cīmūs gasteis Nacionalūs bruņuotūs spāku orkestris, klauseituojim pīduovojūt nūsaklauseit latvīšu strēlnīku i latgalīšu tautys dzīšmu aranžiejumus.

Tik lels koncertturs pa Latgolu orkestram ir pyrmū reizi nu sovys dybynuošonys 1991. godā.

9. oktobrī 18.00 bruņuotūs spāku orkestris koncertēs Dagdys tautys nomā i 10. oktobrī 13.00 – Baļtinovys kulturys nomā, nu 18.00 – Austrumlatvejis koncertzalā “Gors” Rēzeknē. Itys koncerts byus veļteits Vaļsts rūbežsardzis 95. godadīnai.

Sovukuort 11. oktobrī 13.00 bruņuotūs spāku orkestris uzastuos Zylupis tautys nomā, nu 18.00 – Ludzys tautys nomā. 12. oktobrī 13.00 bruņuotūs spāku muziki spielēs Kuorsovys kulturys nomā, nu 17.00 – Vileks kulturys nomā.

Koncerta programa itūreiz izraudzeita eipaša, i tū var sadaleit trejuos daļuos.

Pyrmajā daļā ītiļps popularys latvīšu komponistu kompozicejis i aranžiejumi pyutieju orkestram, nu ūtrajā – latvīšu strēlnīku dzīsmis, kuru vokaluos partejis izpiļdeis orkestra muziki. Sovukuort trešajā tiks atskaņuotys latgalīšu tautys dzīsmis, kurys orkestram izdzīduot paleidzēs Vaļsts rūbežsardzis koledžys kors dirigentis Kristīnis Zeltenis vadeibā.

Pi orkestra dirigenta puļts stuosīs pulkvežleitnants Daiņs Vuškāns i kapteiņs Andris Grizāns.

Turpynojūt Latvejis armejis tradiceju, īīšona koncertūs byus bez moksys.