Nu 9. novembra leidz 7. decembram tierdznīceibys centrā “Ūga”, Preiļūs, laikmeteiguos muokslys sezonys “Preilis” ītvorūs byus apsaverama keramikis Elīnys Titānis personalizstuode “Ceļā”.

Elīna Titāne (1978) 2008. godā dabuojuse magistra grādu Latvejis Muokslys akademejis Keramikys nūdaļā. Regulari pīsadola keramikys simpozejūs i rodūšajuos darbneicuos Latvejā, Pūlejā, Boltkrīvejā, Dānejā, Egiptē i cytuos vaļstīs. Nu 2003. goda aktivi pīsadola izstuožu dzeivē. 2014. godā Elīnys dorbi eksponāti Izmirā (Turceja), Šanhajā (Kīna), Kairā (Egipte), Tunisā (Tuniseja), Reigys muokslys galerejuos, dreizumā gaidoma izstuode ”Naparostys Mežginis” Pītera bazneicā i personalizstuode Porcelana muzejā, Reigā.

Elīnys Titānis dorbim pīmeit izteikti tieļnīcisks raksturs; tei ir tieļnīceiba keramikys materialūs. Radeitī tāli ir abstrakti, poetiski, tī rūsynoj iz breivu interpretaceju radeišonu, mirkleigom asociacejom. Izstuodē “Ceļā” apkūpuoti pādejūs deveņūs godūs radeiti dorbi, ļaunūt skateituojim izsekuot muokslineicys rodūšū vaicuojumu ceļam – nu plastiskim lelformata objektim iz strukturalim tālim. Elīna Titāne: “Maņ muoksla, rodūšums ir process, vierzeiba. Vysod asūt kusteibā. Darbeiba, kuru nanūslādz rezultats. Ceļš, kas nav īvuicams voi īgaumejams, nu vysod nu jauna atkluojams.” Nagaideits trausluma i monumentalitatis apvīnuojums, kontemplaceja par ceļa, atteisteibys temu prīcynuos izstuodis apmaklātuojus rudiņa pādejuos dīnuos, leidz egleitis atkluošonai “Ūgā” 7. decembrī.

Izstuode “Ceļā” tiks atkluota 9. novembrī 14.00 ar keramikys darbneicu saimem muokslineicys Elīnys Titānis vadeibā.

Darbneicys tema: mežs aba kūki, kryumi, meža īmeitnīki i tuo gosti. Zīmyssvātku prīšknūjautuos eipaša viereiba tiks pīvārsta eglem. Darbneicys materials byus Lūdis muols, kam ir rakstureiga skaista, tymsi sorkona kruosa. Itaida Devona perioda muola atradņu pasaulī ir viņ puors. Tys ir vīns nu Latvejis kūšuokajim i skaistuokajim muolim, ar breineigom plastikys īpašeibom veiduošonai. Sadarbeibā ar keramiki Raivo Andersonu vysi dorbi tiks apdadzynuoti i Adventa laikā eksponāti “Ūgā”. Piec Zīmyssvātku tī atsagrīzs pi sovu autoru. 

Īīšona izstuodē i darbneicā: bez moksys

Izstuodis dorba laiks: kotru dīnu 08.00 – 22.00