Ardīvys žurnalam “Katōļu Dzeive” Latgolys Kulturviesturis muzejā

LaKuGa 4. Decembris, 2014. gods Comments Off on Ardīvys žurnalam “Katōļu Dzeive” Latgolys Kulturviesturis muzejā
Ardīvys žurnalam “Katōļu Dzeive” Latgolys Kulturviesturis muzejā

9. decembrī 14.00 Latgolys Kulturviesturis muzejā (Atbreivuošonys alejā 102, Rēzeknē) nūtiks tradicionaluo Viesturis šaļteņu pītura, kurā adventa laika nūskaņuos byus vareiba sasatikt ar žurnala “Katōļu Dzeive” redaktori Marutu Latkovsku i kūpā atsavērt iz 25 mienešroksta izdūšonys godim. Leidz ar goda nūslāgumu žurnals “Katōļu Dzeive” darbeibu puortrauc.

Žurnals “Katoļu Dzeive” pyrmūreiz tyka izdūts nu 1926. leidz 1940.gadam, piec vaira nakai 48 godu puortraukuma 1989. godā tys atsuoce darbeibu i catūrtdaļgodsymta garumā skaiteituojim beja vareiba dziļuok īpazeit i religiskys, i laiceigys temys, boguotynuot latgalīšu volūdu i nu jauna īpazeit daudzys Latgolys personeibys.

Viesturis šaļteņu pīturā atsavērsim i iz žurnala “Katōļu Dzeive” 25 godūs padareitū, i iz atrostū i dabuotū, najaušuos lykumsakareibuos nūteikūšū i īspiejamū. Pasuokuma laikā byus vareiba apsavērt ekspresizstuodi nu Latgolys Kulturviesturis muzeja kruojuma.

Īīšona 9. decembra Viesturis šaļteņu pīturā bez moksys!

Karteņā: no kairuos: “Katōļu Dzeivis” datorsalicieja Silvija Tuča, redaktore Maruta Latkovska, golvonais redaktors pr. Andris Ševels MIC, muokslinīciskais redaktors Jezups Sitnīks MIC, korektore Emīlija Cvetkova, Viļānūs 2001.g. Karteņa nu M. Latkovskys arhiva.

Komentari slāgti.