Viļānu nūvoda Dekšuorēs 14. februarī jau 13. reizi nūtyka Ziņgātuoju i stuostnīku vokors, tuo tema itūgod beja “Sasatikšona i patikšona”. Pīsadaleja 16 kolektivi ziņģātuoji i 4 stuostnīki, kuri ziņgēja i stuosteja par mīlesteibu.

Kai īrosts, ziņgātuoji i stuostnīki vīns ūtru viertēja sovā storpā i rezultatā tyka nūsaceiti ituogods Ziņgis laureati:
• Lobuokais ziņgātuojs – folklorys kūpa “Isnauda”, vadeituoja Ināra Jakupāne nu Ludzys nūvoda;
• Vyslobuokais ziņgātuojs – Zarasu mandolinu spielmani, vadeituojs Gintaras Andrijauskas nu Lītovys;
• Vysvyslobuokais ziņgātuojs – lauku muzykys kapela “Radvija”, vadeituoja Jurate Stakvilevičiene nu Lītovys;

• Lobuokais stuostnīks – Elvīra Sutre nu Viļānu;
• Vyslobuokais stuostnīks – Anita Rutule nu Nagļu;
• Vysvyslobuokais stuostnīks – Alla Kozlovska nu Viļānu.

Taipat skateituoji bolsuoja par sev teikamuokū ziņgātuoju i stuostnīku i itūgod skateituoju simpateju bolvys sajēme:
• Ziņgātuojs – veiru kūpa “Kūzuls”, vadeituoja Inga Stafecka nu Dekšuoru pogosta;
• Stuostnīks – Alla Kozlovska nu Viļānu

Kotru godu pasuokuma organizatori izavielej ari sovus favoritus, pīškirūt puorsteiguma bolvys, itūgod organizatoru sirds eipaši aizkustynuoja i jūs bolvys sajēme:
• Folklorys kūpa “Vecsaule” nu Bauskys nūvoda par dažaidu paaudžu īsaisteišonu tradiceju turpynuošonā;
• Folklorys kūpys “Rota” dzīdūšī veiri nu Rencēnu par ziņgu tradicejis uzturiešonu veiru vydā;
• Stuostneica Anita Rutule no Nagļu par breineigom stuosteišonys tradiceju zynuošonom i prasmem tycamai pasnēgt nūpītni nanūpītnus gadīņus nu dzeivis.

Ziņgātuoju i stuostnīku vokoru finansiali atbaļsteja Vaļsts Kulturkapitala fonds, Viļānu nūvoda dūme, Viļānu kulturys noms, bīdreiba “Lauska”, Tautys muzykantu bīdreiba i tuos sadarbeibys partneri.

Foto: Imants Pulkstenis