Albumā “Lobais reits” apkūpuotys etnografiskuo ansambļa “Vabaļis” dalineicu dzīduotuos katuoļu dzīsmis, kurys ļauds jau vairuokus godu symtus dzīd kasdīnā i svātkūs. Kluotyn pi tautysdzīšmu katuoļu dzīsmis Latgolā ir vīna nu tradicionaluos muzykys pamatkategoreju, tok itaida veida īroksti Latvejā da šam nav izdūti.

Katuoļu dzīsmis, kurys dzīd katuoļu bazneicys goda svātku laikā i krystobuos, kuozuos i bierēs, puorsvorā ir jimtys nu puotoru gruomotu, kurys latvīšu volūdā lelā skaitā tyka izdūtys jau 18. godu symta beiguos. Tok dzīšmu meļdeni tyka puormontuoti mutiskā ceļā, taipat kai tautysdzīsmis. Daudzom dzīsmem tykuse pavysam konkreta funkceja – ir nu reita i vokorā dzīdamuos dzīsmis, dzīsmis pret nalaimi i sv. Ontona dzīsme pret pārkiuņa nagaisu, ir pat dzīsme bārna zūbu šķiļšonuos suopu remdiešonai.

Albuma bukletā īkļauts muzikologa Mārteņa Boiko komentars par itū katuoliskū tradiceju, dzīsmem i dzīduošonys veidu.

Albuma izdūšonu atbolsta Vaļsts kulturkapitala fonds, Daugovpiļs nūvoda pošvaļdeiba, Vabalis pogosta puorvaļde i bīdreiba “Latgalīšu etnokulturys centrs”.