28. martā Reigā pasuokuma “Satiec savu meistaru” ītvorūs tyka prezentāts “Satiec savu meistaru” ūtrais – Latgolai veļteitais DVD, kur īkļauti četri stuosti par Latgolys meistarim i jūs prasmem.

Materials par Latgolys pūdnīkim radeits 2014. goda pavasarī Latgolys pūdnīku dīnu laikā. Meistari Valdis Pauleņš, Jurs Krompāns i Andris Ušpeļs stuosta par sovu pūdnīka pīredzi, sajiutom, tradicejom i myusu dīnom Latgolys keramikā.

Saimineica Janina Skrule īpazeistynoj i ar iesšonys tradicejom latgalīšu saimēs, i atkluoj sovu dzeivis pīredzi mīlasta gataveišonā vysaidim svātku goldim. Diskam dalykti ari diveju Latgolys tradicionalūs iedīņu recepti.

DVD īkļauts ari emocionals stuosts par Baļtinovys bārnim i jaunīšim, kas sovu breivū laiku pavoda, vuicūtīs ausšonys prasmis i pietejūt Zīmeļlatgolys tautys tārpa darynuošonys tradicejis.

Sovukuort muzykys instrumentu meistars Aleksandrs Maijers nu Kruoslovys pusis atkluoj kai pagatavēt skaņu reikus – sviļpaunīkus, stabulis, vargānus, muola zvonus i zvuorguļus, grabuļus i perkusejis nu vysaidu materialu.

DVD “Satiec savu meistaru! Latgale” var īsaguoduot Latvejis Nacionalajā kulturys centrā Reigā, Piļs laukumā 4.

Latgolā DVD tiks prezentāts Latgolys Pūdnīku dīnu ītvorūs 24. aprelī Latgolys Kulturviesturis muzejā.

Karteņa: Cepļa izjimšona Jasmuižā, LaKuGys arhivs