28. junī Daugovpiļs nūvoda Vyšku pogostā nūtiks Latgolys deju svātki “Večerinka Vyškūs”, kur sevkurs varēs izbaudeit dejis valdzynuojumu na tik verūtīs tautys deju kolektivu koncertu, nu ari puorbaudūt sovu iztureibu eistūs latgalīšu daņčūs kūpā ar kapelu “Dziga”.

Deju svātku režisors Māris Susejs stuosta, ka pasuokuma pamatdūma saistuos ar Latgolys lauku sātu, kurā saplyust daudzi etnografiskī atzori, kas atrūn kūpsaucieju latgaliešu večerinkā. Koncerta sižetiskuo lineja tiks sadaleita atseviškūs fragmentūs, kuru īvoddaļa byus saisteita ar tautys muokslys izpausmem – kuozu muzykantim, folklorys kūpom, teiciejom i deveņu apriņču doncuotuojim, kas izdoncuos sev rakstureiguos dejis i atruodeis daudzkruosainūs tautys tārpus. Tok Susejs uzsver ari tū, ka večerinka Latgolā vys vēļ pastuov. Nanūlīdzami tai ir cyts saturs i šarms, tok tei ir dzeiva. Itū ideju paleidzēs atkluot dzīsmineica nu Vyšku – Laura Bicāne i folkroka/metala grupa “Green Novice”.

Svātkim gatavejās 110 kolektivi aba 2113 dalinīki: 54 jaunīšu deju kolektivi ar 1050 dalinīkim, 45 vidiejuos paaudzis deju kolektivi ar 845 dalinīkim i 11 senioru deju kolektivi ar 218  dalinīkim.

Latgolys deju svātkūs “Večerinka Vyškūs” tiks puorstuovāti 23 nūvodi: Aglyunys, Akneistis, Baļtinovys, Bolvu, Cyblys, Dagdys, Daugovpiļs, Īlyukstis, Jākubpiļs, Kuorsovys, Kruoslovys, Krystpiļs, Leivuona, Ludzys, Preiļu, Rēzeknis, Rībeņu, Ruguoju, Solys, Vuorkovys, Viļakys, Viļānu, Zylupis i 3 piļsātys: Daugovpiļs, Jākubpiļs, Rēzekne.

Svātku muokslinīciskuo vadeituoja: Aija Daugele

Viersvadeituoji: Ilmārs Dreļs, Silvija Kurtiņa, Sarmeite Stapule-Zagorska, Elita Treilone, Valda Timule i Agris Veismanis.