Latvejis Televizeja (LTV), gatavejūtīs Latvejis symtajai dzimšonys dīnai, suokuse jaunu projektu “Viens ciems, visa Latvija”, kura ītvorūs Latvejā zynomi rakstnīki brauc iz mozapdzeivuotom vītom, kur īsapazeist ar vītiejim dzeivuotuojim i pietej vītu viesturi i kulturu. Rakstneica Nora Ikstena augustu pavoda staraveru sādžā Slutiškūs.

Kūpā ar rakstnīkim tī uzatur ari LTV filmiešonys komandys, kas veiduos treis dokumentaluos kinys. Tamuos byus radzami rakstnīki, jūs satyktī dzeivuotuoji, tūs redzīni par šudiņdīnys Latveju, paguotnis stuosti i nuokūtnis sapyni. Rakstnīkim, īsadvesmojūt nu cīmūs radzātuo, juotūp stuostim, kurim izvierzeiti diveji nūteikumi: tim juonūteik konkretajā cīmā i myusudīnuos.

Rakstneicai Norai Ikstenai Slutišku napīradynuotais skaistums, ite satyktī cylvāki i jūs liktini byus par pamatu stuostam, kurs piečuok tiks ari dramatizāts. Stuosti i dokumentaluos kinys dīnysgaismu pīredzēs jau ituo goda novembrī. Sovukuort 2016. – 2017. godā vysmoz vīnu nu stuostim (Māris Bierzeņš vosoru pavoda Valgalcīmā, bet Pauls Bankovskis – Apē) planavuots puorveiduot televizejis īstudiejumā. Ar itū projektu LTV gryb fiksēt Latveju eisai pyrma symtgadis i reizē ari dūt byutisku īguļdejumu latvīšu rakstnīceibys i dramaturgejis atteisteibā.