6. oktobrī 16.00 Latgolys Centraluos bibliotekys (LCB) Abonementā tiks atkluota muokslineicys Unys Gurys i keramikis Lilejis Zeiļys izstuode “Caur ēnu gaisma”, informej LCB golvonuo bibliotekare Inga Gedžūne. Izstuodē byus apsaveramys Unys Gurys gleznys i keramika, kai ari Lilejis Zeiļys veiduotī dekorativī škeivi.

Muokslineica Una Gura ir dzymuse 1972. godā Daugovpilī. Absolvējuse Rēzeknis Lītiškuos muokslys vydsškolu (sajemūt muokslinīka – meistara – keramika diplomu) i Latvejis Muokslys akademejis Pedagogejis-stuojgleznīceibys fakultati, kas ļuove suokt aktivu darbeibu gleznīceibā. Piečuok turpynuojuse izgleiteibu Daugovpiļs Universitatē, sajemūt magistra grādu muokslā i pedagogejā. Itūšaļt dorbojās gleznuošonā i keramikā, īsasaista Daugovpiļs regiona muokslinīku asociacejis i Daugovpiļs Muola muokslys centra rodūšajuos aktivitatēs, pīsadolūt plenerūs, izstuodēs i cytūs ar muokslu saisteitūs pasuokumūs Latvejā i uorvaļstīs (Boltkrīvejā, Dānejā, Pūlejā i Lītovā). Personeigī rodūšī vaicuojumi teik veiksmeigai apvīnuoti ar pedagogiskū dorbu – kasdīnā Una Gura ir školuotuoja Daugovpiļs Saskanis pamatškolā i Daugovpiļs Dizaina i muokslys vydsškolā “Saules skola”.

Keramike Lileja Zeiļa dzymuse 1958. godā Daugovpilī. Profesionalū izgleiteibu sajāmuse Rēzeknis Lītiškuos muokslys vydsškolys Keramikys nūdaļā. 1978. godā īsasaistejuse A. Paulāna Tautys lītiškuos muokslys studejis (TLMS) darbeibā. 1986. godā sajāmuse Tautys daiļomota meistara kvalifikaceju. 1992. godā suokuse patstuoveigys pūdnīka gaitys. Itūšaļt voda Daugovpiļs Nūvodpietnīceibys i muokslys TLMS “Latgale”. Regulari pīsadola izstuodēs i cytūs ar keramiku saisteitajūs projektūs Latvejā i uorvaļstīs, nūzeimeigu laiku veļtej pedagogiskajam dorbam.

Izstuodē “Caur ēnu gaisma” skateituoju viertiejumam teik pīduovuotys Unys Gurys gleznys, kas veiduotys, stilizejūt realys ainovys par abstraktom kompozicejom. Ari Lilejis Zeiļys keramikys škeivu gleznuojumi ir abstrakcejis. Tūs vyrmuojūšajuos glazuruos sevkurs var raudzeit saredzēt sev tyvus tālus. Rodūt sovus muokslys dorbus, obejis muokslineicys spielejās ar najaušeibom. I Una, i Lileja plyudynoj i lej, tok kotra sovā materialā – tei ir vīnuota tīkšonuos caur najaušeibu iz harmoniskom, naradzātom kompozicejom, kuruos muokslineicys nūdūd skateituojam.

Unas Gurys i Lilejis Zeiļys rodūšuo tandema veikums izstuodē “Caur ēnu gaisma” byus apsaverams LCB abonementā i laseitovā nu 6. oktobra da 4. novembra.