Rēzeknē apsaverama izstuode “Mirkļi stiklā”

LaKuGa 19. Oktobris, 2015. gods Comments Off on Rēzeknē apsaverama izstuode “Mirkļi stiklā”

Da 10. novembra Latgolys Kulturviesturis muzejā (Atbreivuošonys alejā 102, Rēzeknē) apsaverama Leivuona stykla laidynuošonys darbneicys izstuode “Mirkļi stiklā”, aicynojūt īpazeit styklu kai plastisku materialu i izstuodis nūslāgumā pīsadaleit stykla rodūšajā darbneicā, informej muzeja muokslys nūdalis vadeituoja Inese Dundure.

Leivuons ir piļsāta ar senejom stykla muokslys tradicejom, partū izstuodē apmaklātuoju viereibai ir pīduovuoti stykla izstruoduojumi – dekori i interjera prīškmati, škeivi, rūtyslītys, īdzeivynojūt materiala puorvierteibys, kas rūnās tū laidynojūt, sleipejūt voi apstruodojūt cytā tehnikā. Īpazeit styklu kai plastisku materialu niu var i Leivuona muokslys i omotnīceibys centrā, i ari Leivuona inženertehnologeju i inovaceju centrā, partū ka tī izveiduota stykla laidynuošonys darbneica. Leivuona piļsātā ir styngri apsajāmuši saglobuot nazkodejuos stykla fabrikys tradicejis, kas reizē ar fabrikys sliegšonu pamozom teik aizmierstys.

Skaiteit vaira par Leivuona stykla fabrikys viesturi.

Niu, kod ryupneica ir slāgta, cylvākim ir līgta vareiba īsapazeit ar stykla apstruodis procesu. Partū “Radošā apvienība “Perspektīva”” pīduovoj stykla laidynuošonys darbneicu, kurā sevkurs interesents var īsapazeit ar rūtyslītu i cytu dekorativu stykla izstruoduojumu radeišonys procesu. “Stykla laidynuošonys tradicejis ir senejis i interesantys,” uzsver muokslineica i darbneicys vadeituoja Inga Salmiņa, ruodūt stykla pērleišu izgataveišonys procesu. Muokslineica stuosta, ka stykla laidynuošonys process ir cīši rodūšs, partū ka izlaidynuotajam styklam var pīškiert vysvysaidys formys. Darbneicā teik radeiti stykla dekori i rūtyslītys, i darbneicys vadeituojis planūs jau jaunys aktivitatis, kas rūsynuos jaunu muokslys prīškmatu radeišonu, savīnojūt styklu ar cytim materialim, vuicūtīs jaunys stykla apstruodis tehnikys. Stykla škeivu laidynuošonys tehniku meistare īsavuicejuse stykla muokslys darbneicā Čehejā. Stykla laidynuošonys darbneica na viņ izgleitoj interesentus, nu ari popularizej Leivuonu kai stykla piļsātu.

Bīdreiba “Radošā apvienība “Perspektīva”” VKKF atbaļsteituo projekta “Stikls jaunā gaismā Latgalē” ītvorūs izstuodis nūslāgumā 10. novembrī 12 stuņdēs pīduovoj rodūšū darbneicu, kuru vadeis meistare Inga Salmiņa. Darbneicā dalinīku skaits ir īrūbežuots (10-15 cylvāku), īprīšk juodasasoka, zvonūt 64622464.

Izstuode attaiseita:
ūtardiņ, trešdiņ, catūrtdiņ, pīktdiņ 10.00 – 17.00
sastdiņ – 10.00 – 16.00
svātdiņ, pyrmūdiņ – slāgta.
Īīšonys moksa izstuodē: školānim, studentim – 0.50 eiro, pīaugušajim – 0,80 eiro.

afisha_STIKLS_7

Komentari slāgti.