Itūgod jau ostuotū reizi tiks padūtys latgalīšu kulturys goda bolvys “Boņuks 2015”. Padūšonys ceremonejā tiks gūdynuotys nūtikšonys, cylvāki, aktivitatis, kas latgalīšu kulturā bejušys nūzeimeigys 2015. godā. Latvejis Izpiļdeituoju i producentu apvīneiba (LaIPA) nūsaukuse nominantus kategorejā “Radejis hits”.

LaIPA, apkūpojūt radejis stacejuos pārņ vysvaira atskaņuotuos latgalīšu dzīsmis, ir nūsacejuse četrus pretendentus iz bolvu nominacejā “Radejis hits”:

• Austrumkalns – “Rūtoj bite, rūtoj saule”

• Dabasu Durovys – “Pādys”

• Folklorys kūpa “Upīte” – “Kur tu skrīsi vanadzini” (Artūra Slišāna remix)

• Ginc&Es – “Puor Gauju”

“Latvīšu kultura ir dažaida i cīši boguoteiga. Vīna nu leluokajom kulturys vierteibom ir volūda. Prīcojūs, ka teik reikuots “Boņuks”, gūdynojūt muzikus, kas uztur dzeivu latgalīšu volūdu i īpazeistynoj ar tū leluoku sabīdreibu. Izviertejūt dzīsmis kategorejā “Radejis hits”, radzam, ka leluos radejis stacejis lobpruot atskaņoj latgalīšu volūdā radeituos dzīsmis, padorūt tuos konkurētspiejeiguokys Latvejis leiminī. LaIPA vuordā apsveicu vysus nominantus i vieleju panuokumus ari tuoluokajā muzykalajā darbeibā,” soka LaIPA izpylddirektore Liena Grīna.

Svineiguo bolvys padūšonys ceremoneja byus ituo goda 28. februārī 16.00 Latgolys viestnīceibys GORS Lelajā zalā. Ceremonejis pyrmajā daļā tiks izruodeits uzvadums „Saule. Bērni. Rainis”, kurīs radeits pyrmajā vargaņu muzykys festivalā  „ORGANismi”, bet ceremonejis ūtrajā daļā tiks gūdynuoti nūtikšonys, ļauds i aktivitatis, kas latgalīšu kulturā bejuši svareigi 2015. godā.

Latgalīšu kulturys goda bolvys „Boņuks 2015” nūtikšonu atbolsta Vaļsts kulturkapitala fonds, Rēzeknis piļsātys dūme,  Rēzeknis nūvoda, Daugovpiļs nūvoda, Bolvu, Kuorsovys, Cyblys, Dagdys, Ludzys, Leivuona, Viļakys, Ruguoju i Baļtinovys nūvodu pošvaļdeibys, Nacionalais Kinu centrys.

Puorejūs kategoreju nominantu saroksts