Reigā nūtiks Aulejai veļteits tradicionaluos dzīduošonys vokors

Reigā nūtiks Aulejai veļteits tradicionaluos dzīduošonys vokors

15. aprelī 19.00 Veinu veikala zalā, Kolncīma īlā 35, Reigā, nūtiks tradicionaluos dzīduošonys vokors, kas veļteits Aulejai.

Itys koncerts dūmuots tim, kas gryb īsajust Latgolys lauku ainovā, dasatyvuot tim cylvākim, kas struoduoja gryutūs zemnīka dorbus, nu kurūs sirdīs beja daudz prīcys, dzeiveibys i mīlesteibys. Kotru dzeivis nūtikšonu jī pavadeja ar dzīsmem – kuozuos voi bērēs, kod beja skumeigai voi kod gryuši juostruodoj, kod doba mejuos – jī dzīduoja. Ar dzīsmem dareja pasauli lobuoku.

Ituo vokora centrā byus Auleja, i vokora varūnis byus Aulejis dzīduotuojis, par kuruom stuostūs pasadaleis i kurūs dzīsmis dzīduos “Tautumeitas”.

“Tautumeitas” ir grupa, kurymā apsavīnuojušys sešys muzikis, nu kurūs leluokuo daļa vuicuos etnomuzikologeju Jezupa Vītuola Latvejis Muzykys akademejā. Itūšaļt dalineicys izkūp taišni tradicionalū daudzbolseigū dzīduošonu, vuicūtīs nu izcylu latvīšu i cyttautu teicieju. Itūgod grupa sajēme Latgalīšu kulturys goda bolvu “Boņuks 2015” divejuos nominacejuos: “Goda debeja” i “Lobuokais muzykys video”.

Koncerts ir Jezupa Vītuola Latvejis Muzykys akademejis Etnomuzikologejis klasis studeņtis Asnatis Rancānis diplomeksamens.

Koncerta īīšonys moksa: 7 eiro.

Nūtikšonu kalendars