Muzeju Nakts nūtikšonys Latgolā

LaKuGa 19. Majs, 2016. gods Comments Off on Muzeju Nakts nūtikšonys Latgolā
Muzeju Nakts nūtikšonys Latgolā

21. maja vokorā vysā Latvejā nūtiks storptautiskuos akcejis “Muzejs Nakts” nūtikšonys, kurūs tema itūgod ir “Durovys”. Daudz vysaidu aktivitašu gaidoms ari Latgolā.

Baļtinovys nūvoda muzejā itymā vokorā tiks atkluota izstuode, kai ari byus vysaidys aktivitatis: tiks puorbaudeita i gudreiba, i atjauteiba, i rodūšums, i sportiskums.

Bolvu nūvoda muzejā byus apsaveramys Zīmeļlatgolys omotnīku taiseitys durovys, taipat varēs ceļuot pa muzeju, vaicojūt atbiļdis iz vaicuojumim. Sovukuort Luoča duorzā tiks attaiseita Erika Kanaviņa senejūs omotu darbneica.

Daugovpiļs nūvodpietnīceibys i muokslys muzejā varēs ceļuot pa muzeja ekspoziceju i izstuožu zalim, muzeja pogolmā nūtiks koncerts. Paradzātys ari rodūšuos darbneicys, spēlis, kai ari smiļšu kina.

Daugovpiļs skrošu ryupneicā byus attaiseita ryupneicys viesturis, medeibu i sporta municejis ekspoziceja, kai ari ryupneicā vydā paradzātys grafiti meistarklasis.

Daugovpiļs cītūkšņa kulturys i informacejis centrā apmaklātuojus sagaida vareiba dzierdēt stuostus par cītūkšņa vuortim.

Fraņča Trasuna muzejā “Kolnasāta” varēs apsavērt ekspozicejis i muzeja kompleksu, nūtiks rodūšuos darbneicys, muzejpedagogiskuo programa “Pa Franča bērnības takām”, kai ari uzastuos Sakstagola pogosta pošdarbnīki.

Kruoslovys viesturis i muokslys muzejā vysa vokora garumā varēs apsavērt ekspozicejis i izstuodis, taipat byus ari dzeivuos dobys styureits, viesturis nūtikšonu rekonstrukcejis Kroma kolna bruolistis izpiļdejumā, uzastuos eksotiskūs deju grupa “Fazira” i vokaluo studeja “Stage On”. Izjuodis ar zyrgim pīduovuos Zyrgu sāta “Klajumi”.

Latgolys Kulturviesturis muzejā Rēzeknē varēs īpazeit muzeju, nūtiks ari konkursi, rodūšuos darbneicys, prezentacejis i spēlis, eksperimenti. Laukumā pi muzeja paradzāta muokslys performaņce, kai ari dzeivuo muzyka.

Rēzeknis Zaļajā sinagogā nūtiks klezmera muzykys koncerts, stuosts par muzykys žanra pyrmsuokumim i instrumentim, kai ari varēs izīt ekskurseju pa sinagogu gida pavadeibā.

Latgolys Muokslys i omotnīceibys centrā Leivuonā tiks vuoktys saimisteibā navajadzeigī atslāgi, kab piečuok nu tūs varātu izveiduot sūleņu ar piļsātys moto “Leivuons – atslāgs Latgolys vuortūs”. Taipat varēs apsavērt ari izstuodis i pīsadaleit rodūšajuos darbneicuos.

Ludzys nūvodpietnīceibys muzejā tiks atkluota fotoizstuode “Durvis” i byus Pītera Blūma lekceja “Durvju stāsts”. Piečuok tiks atkluota ari Janinys Tabūnis 80 godu jubilejam veļteituo izstuode ar dzejneicys draugu i rodu muzykalu sveicīni. Pasuokuma izskaņā paradzāta rodūšuo darbneica.

Lūznovys muižā varēs pīdzeivuot ceļojūšuo festivala “Vadātājs” pīturys muokslinīciskūs pīdzeivuojumus, ekskursejuos īsapazeit ar muižu i tuos ustobys viersā baudeit latgalīšu akustiskuos muzykys koncertu. Ceļojūšais festivals “Vadātājs” ir rodūšūs nūzaru kūpprojekts – izbraukuma pasuokums, kurymā vīnojās vysaidi muokslys i kulturys veidi. Lūznovā muižys i ceļojūšuo festivala “Vadātājs” moto, sasasaucūt ar ituo gods Muzeju nakts temu “Durvis” ir “Atver durvis uz MŪZU!”. Ceļojūšuo festivala pīturā Lūznovā apmaklātuojus gaida laikmeteiguos dejis izruode, dzejis i muzykys kūpprojekts, ansambļa “Manta” koncerts, Latvejis jaunūs režisoru eiskinu programa, kai ari pyrmū reizi apmaklātuojim “durovys taiseis” muižys ustobys vierss, kurymā apmaklātuojus prīcynuos akustiskais latgalīšu muzykys koncerts.

Maltys viesturis muzejā tiks atkluota ekspoziceja “Zirgvilkmes braucamrīki un to piederumi”, varēs vyzynuotīs zyrga aizjiugā, kai ari muzicēs grupa “Dabasu Durovys”.

Preiļu viesturis i lītiškuos muokslys muzejā nūtiks diveju jaunu izstuožu atkluošona: “Preiļu Romas katoļu baznīca gleznās” i “Borhu dzimtas atspulgi”. Preiļu muižys kapelā nūtiks Aglyunys bazilikys kora “Assumpta” veiru grupys koncerts, muzicēs ari Preiļu pogosta folklorys kūpa “Leiči” i Pelieču pogosta folklorys kūpa. Paradzāti ari konkursi i sportiskys aktivitatis, nu vokors tiks nūslāgts ar tradicionalū Muzeju Nakts zupu.

Raiņa sātā Berkenelē nūtiks rūtalis ar teatra studeju “Kamolītis”, tiks atkluota Sintijis Kampānis izstuode “Mašīnas”. Muzejā gasteis ari Latgolys prīškpylsātys muzykys školys kūklātuoju ansamblis “Liepa”, kai ari nūtiks rodūšuos darbneicys i Maduma pamatškolys Marionešu teatra izruode “Eirovīzija 2016”.

Raiņa muzejā “Jasmuiža” nūtiks Rudzātu teatra kūpys “Okūts” izruode “Kaimiņu būšana”, kai ari tiks izstuosteits Latgolys tradicionaluos kulturys i omotu sātys stuosts.

Roberta Mūka muzejā Gaļānūs uzastuos Arņs Slobožanins, nūtiks nūdarbeiba ar Vydsmuižys katuoļu bazneicys pravestu Česlavu Mikšto, tiks atkluota Osvalda Zvejsalnieka dorbu izstuode, kai ari nūtiks rodūšuos apvīneibys “Mūka ķēķis” literari muzykalais izvadums “Es esmu vaļējas durvis”.

Skryndu dzymtys muzejā Vabalē paradzātys vysaidys rodūšys aktivitatis, kurūs laikā tiks svieteits muzeja 20 godu jubilejs, nūtiks Irenys Voitānis viesturiskūs drēbu kolekcejis demonstriejumi, kai ari videoprezentaceja “Durvis”.

Varakļuonu nūvoda muzejā tiks atkluota Varakļānu vydsškolys 95 godu jubilejam veļteituo izstuode, kai ari izskanēs šlagermuzika H. Madzuļa koncertprograma.

Viļakys nūvoda muzejā tiks atkluota izstuode “Viļakas novada vēsture cauri laiku lokiem”, nūtiks nūvoda muokslinīku koncerts. Varēs apsavērt muzeja ekspozicejis i pīsadaleit rodūšajuos darbneicuos, kai ari baudeit putru piec seņtāvu recepta.

Vaira informacejis par nūtikšonom var vaicuot Muzeju Nakts sātyslopā

Komentari slāgti.