Aizvadeitajā nedeļgolā Krīvejis kulturys golvyspiļsātā Sanktpīterburgā nūtyka Latgolys kulturys festivals. Itūgod festivals svieteja nalelu jubileju – itys beja jau pīktais gods, kod latgalīši brauc iz Krīveju popularizēt sova regiona kulturu, tradicejis i turisma pīduovuojumu. Festivala nūtikšona ir īspiejama, pasasokūt ilggadejai i veiksmeigai Latgolys regiona atteisteibys agenturys (LRAA) sadarbeibai ar LR generalkonsulatu Sanktpīterburgā i Centralū Kirova kulturys i atpyutys parku, informej LRAA puorstuovs Edgars Kluss.

Itūgod puorstuovēt Latgolu iz Sanktpīterburgu brauce folklorys kolektivi “Sudobri” nu Leivuona nūvoda i “Dyrbyni” nu Daugovpiļs nūvoda. Taipat ar sovom prasmem festivala apmaklātuojus īpazeistynuoja senejūs omotu meistari i sātys ražuotuoji nu vysa regiona. Par atpyutys vareibom Latgolā festivala apmaklātuojus informēja pošvaļdeibu turisma informacejis centru specialisti i Marka Rotko muokslys centra darbinīki.

10. junī svineigs pasuokums nūtyka Latvejis Republikys generalkonsulatā Sanktpīterburgā, sovukuort 11. i 12. junī latgalīši dorbuojuos Kirova parkā. Nasaverūt iz tū, ka laika apstuokli itymā godā latgalīšus nalutynuoja, tys natraucēja radeit patīsai sirsneigu i ļusteigu atmosferu tik cīši jau īrostajā i īmeiļuotajā Pīterburgys dzeivuotuoju atpyutys vītā iz Jelagina solys.

“Krīvejis i eipaši Sanktpīterburgys i Moskovys turisma tiergs ir cīši nūzeimeigs Latgolys turisma nūzaris atteisteibai, partū myusu aizdavums ir napuortraukti atguodynuot par atpyutys vareibom Latgolā – bezstresa regionā – paceli nu lelūs piļsātu intensivuo dzeivis ritma, akumulejūt energeju jaunim dorba cielīnim, eipaši niule, kod drūšeibys riski pīauguši daudzūs īcīneitūs kurortūs i Krīvejis dzeivuotuoju moksuotspiejis leimiņs kreitās i jim līk atsasaceit nu ceļuojumu iz tuolim i duorgim golamierkim,” pastreipoj Latgolys regiona atteisteibys agenturys direktors Māris Bozovičs.