Kolnasāta 30. julī

LaKuGa 31. Juļs, 2016. gods Comments Off on Kolnasāta 30. julī
Kolnasāta 30. julī

Lelajā sarunā raidejumā “Kolnasāta” gastej kinologs Valdis Bikovskis. Jis kasdīnā struodoj Vaļsts ījāmumu dīnasta muitys Kinologejis nūdaļā i apvuica dorba suņus. Kūpā ar īprīkšejū suni Roxxi četrus godus bejs misejā Kosovā, bet nu Vuocejis iz Latveju pyrma vairuoku godu atveds ideju par saceņseibom, kuruos sauc par suņu biatlonu. Tei ir apmāram 8-9 km gara škieršļu jūsla, kurū suņs i saiminīks puorvar skrīnūt, reizē ir juoizpylda vysaidi aizdavumi, par pīmāru, suņam ir juoaiztur cylvāks kūžūt, sovukuort saiminīkam juosaun mierkī. Valdis Bikovskis ar dažaidim sunim ir sajiems gūdolguotys vītys i Latvejis, i storptautyskuos saceņseibuos.

Atsasaucūt iz Laurys Stepenis rokstu, Dace Dambe sižetā skaidro situaceju saisteibā ar literaturys almanahu “Olūts” i izzynoj, ka bez atļuovis publicāti ari žurnalistis Janys Skrivļys-Čeveris dorbi. Autortīseibu i komuniciešonys konsultaceju agenturys puorstuove Inga Mūrniece nūruoda, pat, ka autoram nav nūslāgts leigums ar juo tīseibys puorstuovūšu organizaceju, bez atļuovis publicejūt tuo dorbu, teik puorkuopts autortīseibu lykums. Tikom Latgolys Kulturys centra izdevnīceibys vadeituojs Juoņs Elksnis skaita, ka tys nav puorkuopums, jī gribējuši dareit lobu.

Vuordineicā Valentins Lukaševičs i Arņs Slobožanins skaidroj, kū nūzeimoj vuords “želvuošona”.

Komentari slāgti.