Nu 5. da 17. septembra nūtiks Daugovpiļs nūvoda dīnys, diveju nedeļu garumā puļcejūt pogostu dzeivuotuojus iz izstuodem, meistardarbneicom, sporta aktivitatem i konkursim, viestej nūvoda sātyslopa. Itaidu vareibu itūgod pīduovuos Laucesys, Salīnys, Skrudalinys, Taboris i Vacsalīnys pogosti, turpynojūt 2014. godā aizsuoktū pogostu dyžuošonuos tradiceju. Svātku kulminaceja nūtiks 17. septembrī ar kruošņū Nūvoda dīnu godatiergu. Daugovpiļs nūvoda dīnys jau tradicionali teik reikuotys septembrī ar mierki sekmēt nūvoda atpazeistameibu, dūt vareibu Daugovpiļs i Latgolys dzeivuotuojim īpazeit lauku ražuotuoju i tautys montuojuma produktu vierteibys, kulinarū montuojumu, turisma vareibys, boguotuos tradicejis i gūdynuot omota prasmu nesiejus.

10. septembrī Daugovpiļs nūvoda pošvaļdeibys agentura “TAKA” sadarbeibā ar pogostim organizej divejis ekskursejis – iz Taboris, Salīnys i Vacsalīnys pogostim, ūtru – Laucesys i Skrudalinys pogostim.  Ekskurseju  vadeis profesionali nūvoda gidi. Dasasaceišona da 5. septembra, rokstūt  taka@dnd.lv voi zvonūt 65422818, 65476748.

17. septembrī ar plašu kulturys programu i cytom aktivitatem apmaklātuojus aicynuos Nūvoda dīnu godatiergs, kas nūtiks nu 10.00 da 14.00 Reigys īlā 2.

Ražuotuoju i omotnīku godatiergā vītejī Daugovpiļs nūvoda ražuotuoji, kai ari tierguotuoji i omotu meistari nu cytu Latvejis nūvodu puorsteigs apmaklātuojus ar daudzveideigū produkceju. Te varēs īsaguoduot madu, maizi, gali, sīru, duorziņus, dekorativūs stuodus, izstruoduojumus nu kūka, tekstila, keramikys i lyna, adejumus, kapcejumus, sātys veinu, čajus, pynumus, gruomotys i suvenirus.

Kai kotru godu, ar sovu produkceju prīcynuos mozpulku kolektivi, taipat godatiergā pīsadaleis Daugovpiļs nūvoda muzeju puorstuovi, školānu i jaunīšu organizacejis, īsaistūt apmaklātuojus rodūšūs darbneicu vyrpulī.

Īsavērt Laucesys, Salīnys, Skrudalinys, Taboris i Vacsalīnys pogostūs tyvplanā varēs caur karteņu izstuodi. Sovukuort Latgolys Zooduorza ekspozicejā varēs apsavērt Eiropys ratūs abinīkus i ruopuļus, kas atrūnami Daugovpiļs nūvodā. Ari Daugovpiļs Universitate itūgod kluotyn asūšajim pīduovuos rodūšū darbneicu “Dabas laboratorija”.

Vīneibys laukumā vysys dīnys garumā nūtiks strītbola, svorbumbu ceļšonys saceņseibys i basketbola sūda metīņu konkurss, sovukuort Dambretis i šaha klubā nūtiks Nūvoda dīnom veļteits šaha i dambretis turnirs.

Kulturys cīneituoji varēs izbaudeit svātku lelkoncertu, kurā sovys programys prezentēs pogosti, Šarkovščinys vuocu kulturys i tautys muokslys centra trio “Вдохновение” nu Boltkrīvejis, tautys deju ansamblis “Līksme”, folklorys kūpa “Dyrbyni”, kai ari svātku eipašuo gaška Olga Rajecka.