Rogovkā vosoruoja 30 nūvodvuiceibys entuziasti

LaKuGa 2. Septembris, 2016. gods Comments Off on Rogovkā vosoruoja 30 nūvodvuiceibys entuziasti

IMG_0166Jau dasmytū reizi Rogovkā (Rēzeknis nūvodā) saguoja kūpā vosorys nūmetne školuotuojim i studentim “Vosoruošona”. Tradiceja, kas īdybynuota 2000. godā, dažaiduos Latgolys školuos kūpta leidz pat 2006. godam, atjaunuota 2012. godā, pa itim godim kūpā puļcejūt puori par 300 pedagogu i latgalīšu kulturys kūpšonys interesentu. Itūreiz nūmetnis tematika beja saisteita ar nūvodvuiceibys prīkšmata standartu, paraugprogramom, metodiku i saturu. Izgleitojušū i kulturys programu nu 31. juļa da 5. augusta nūdrūsynuoja 22 dažaidu jūmu specialisti: vuiceibspāki nu Rēzeknis Tehnologeju akademejis, Latvejis Universitatis, Daugovpiļs Universitatis, muzykanti, literati, školuotuoji, toponimikys, kulturviesturis, psihologejis specialisti.

Latgalīšu volūdys, literaturys, kulturviesturis školuotuoju asociaceja (LVLKŠA, vadeituoja Veronika Dundure), pasasokūt Rēzeknis, Kuorsovys, Daugovpiļs nūvodu pošvaļdeibom, Rēzeknis piļsātys dūmei, Nautrānu pogosta puorvaļdei, Latvīšu volūdys agenturys i Vaļsts Kulturkapitala fonda projekta finansiejumam, varēja nūdrūšynuot plašu i daudzveideigu vosorys nūmetnis programu.

Vosoruošonys ritmys

Nūmetnis dalinīku dīna suocēs ar psihologisku dopingu Kaspara Bikšis vadeibā ap septenim nu reita i beidzēs vēļ šaļteni piec pušnakts muzykys, dzīšmu, literaru tekstu voi rodūšu improvizaceju nūskaņuos. Var saceit, ka nūmetnē vaļdeja nūvodvuiceibys pilotiešonys gaisūtne, prūti, nūdarbeibys nūtyka latgalīšu i latvīšu literarajā volūdā, mejuos volūdys, kulturys, psihologejis lekcejis i interaktivys nūdarbeibys ar rodūšom darbneicom, kuruos tyka izšyutys latvu ornamentu zeimis, veiduoti smiļšu i mandalu terapejis muokslys dorbi, nūtyka literari i muzykali vokori i improvizacejis, īsajiutūt i Alisis Breinumzemis pasaulī, i atguodojūt Raiņa “Zalta zyrga” vadmotivus. Naizpalyka ekskurseja, īpazeistūt Nautrānu pogostu i tuo omotnīkus: kaļvu Juoni Ļubku, pūdnīku Pīteri Gailumu, floristi i duorzu dizaineri Maiju Gailumu. Taišni tys ir nūvodvuiceibys “suoļs” – leidza dorbuotīs, pasadaleit, izjust, izgaršuot, izdiskutēt, na paspēt izjimt programu i dorbuoties tik klasē školuotuoja viersvadeibā.

Kū sajēme vosoruotuoji? Sovstorpejis mejīdarbis jutūnē dažam vēļ tik zamapzinī, cytam jau skaidrā nūvodvuiceibys stuņžu planā īsarakstēja i izpratne par latgalīšu volūdys juridiskū statusu i leksikys boguotynuošonys vareibom i vajadzeibu, i dzymtys kūka, rodu rokstu i semantiskuo analize, i psihologiski treneni stuņžu veiduošonys procesā, IT īspiejis, vuicūtīs kulturologejis i nūvodvuiceibys tematiku, i suitu i latgalīšu bīdreibu pīredze kulturmontuojuma saglobuošonā i nūdūšonā jaunuom paaudzem, muzykantu i literatu degsme latgalīšu volūdys kūpšonā.

Vosoruotuoji

LVLKŠA, atjaunojūt školuotuoju nūmetņu reikuošonys tradiceju, apsajēme tū organizēt vysmoz reizi divejūs godūs. Itamā nūmetnē beja daudz “debitantu”, prīcēja, ka beja školuotuoji nu Vydzemis regiona školu. Tok nūmetnis kūdulu veiduoja školuotuoji i latgalīšu kulturys kūpieji, kas jau vairuokys reizis ir bejuši Vosoruošonā i kasdīnā struodoj ar latgaliskūs vierteibu kūpšonu i tradiceju veiduošonu. Svareigi, ka lektori i klauseituoji beja kūpā i nūdarbeibuos, i kulturys pasuokumūs, prūti, napuortraukts i rodūšs mejīdarbis process nūmetnis garumā. Tai ir īspiejams lektorim saprast, kas nu jūs praktizejamuom temom voi metodem ir tuola utopeja školai voi myusu dīnu pusaudžu, jaunīšu uztverei, sovukuort školuotuojim – pasakonsultēt individuali, dybynuot tīšus kontaktus kūpeigu projektu realizacejai. I prīcynoj fakts, ka Rēzeknis piļsātys školuotuoji, kas jau treis godus ar Rēzeknis pošvaļdeibys finansialu atbolstu vuica riezeknīšim nūvodvuiceibu, gotovi vuiceibu leidzekļu veiduošonai i lobpruot sovu pīredzi nūdūtu cytim školuotuojim.

Par nūmetnis dalinīkim šaļti pabeja ari plošsazinis leidzekļu i pošvaļdeibu puorstuovi, kas īsaroda iz nūmetnis nūslāguma diskuseju, kuruos laikā tyka pījimts aicynuojums Latvejis izgleiteibys darbinīkim i diskutāts par mierkdotacejis vajadzeibu nūvodvuiceibys praktiskai īvīsšonai. Kai atzyna LVLKŠA vadeituoja, Nautrānu vydsškolys latvīšu volūdys i literaturys školuotuoja V. Dundure: “Školuotuojam myusu dīnuos pītyktu jau ar grybu viņ i školys vadeibys atbolstu, partū ka vuiceibu leidzekļu pīteik, nu argumentus i motivaceji, parkū nūvodvuiceibai juobyut školuos, diktej globalizacejis i unifikacejis godu symts. Vajag tik uzadreikstēt.” Ka i jiusu škola ir īinteresāta standarta, paraugprogramu izstruodē, rokstit lvlksa@inbox.lv, veiduosim nūvodvuiceibys nuokūtni kūpā!

Aicynuojums Latvejis izgleiteibys darbinīkim

Teksta autore: Ilga Šuplinska, septeituos nūmetnis vosoruotuoja

Komentari slāgti.