Viesturis šaļteņu pīturā itūmienes par Rēzeknis izgleiteibys īstuodem

LaKuGa 9. Septembris, 2016. gods Comments Off on Viesturis šaļteņu pīturā itūmienes par Rēzeknis izgleiteibys īstuodem

rezeknes-skolas-20-gs-30-gadi-foto-no-lkmkrajumaŪtardiņ, 13. septembrī, 14.00 Latgolys Kulturviesturis muzejā (Atbreivuošonys alejā 102, Rēzeknē) nūtiks tradicionaluo Viesturis šaļteņu pītura, kas itūreiz veļteita tematam “Izgleiteibys īstuodis Rēzeknē 1920–1940”, kurā vysim interesentim byus vareiba īsapazeit ar Rēzeknis izgleiteibys īstuožu viesturis puslopom, kai ari izzynuot školu āku viesturiskūs liktiņus, informej muzeja eksperts kulturviesturis vaicuojumūs Kaspars Strods.

Piec Rēzeknis piļsātys atbreivuošonys nu lelinīku armejis karaspāka daļu 1920. goda janvarī nūtyka pakuopiniski piļsātys atjaunuošonys dorbi. Vīna nu aktualuokajom lītom beja sabīdreibys izgleituošonys procesa veicynuošona, tuo rezultatā tuoluokajūs godūs Rēzeknis piļsātā izaveiduoja vairuokys vuiceibu īstuodis, kuruos beja vareiba vuiceitīs vysaidys specialitatis i prasmis. Itymā laika pūsmā paraleli pamatškolom i vydsškolom izaveiduoja ari vairuokys augstuokuo leimiņa vuiceibu īstuodis, kam beja īvaruojama lūma tuoluokajā tautys izgleituošonys procesā na tik Rēzeknis piļsātys i Latgolys regionā, nu ari vysys Latvejis vaļsts kontekstā (par pīmāru, Rēzeknis Vaļsts školuotuoju instituts).

Nūzeimeigs apstuoklis beja Rēzeknis piļsātys daudznacionalais dzeivuotuoju sastuovs, tuo rezultatā paraleli latvīšu izgleiteibys īstuodem izaveiduoja ari vairuokys školys, kas beja paradzātys vītejūs minoritašu puorstuovim. Par pīmāru, dorbuojuos krīvu, pūļu i ebreju tauteibys puorstuovim izveiduotuos školys, kas na tik veice sovu tīšu funkceju (izgleitojūšū), nu ari boguotynuoja piļsātys kulturviesturiskū vidi.

Kaidys izgleiteibys īstuodis dorbuojuos Rēzeknis piļsātā paguojušuo godu symta 20.–30. godūs i kaids ir bejs itūs āku viesturiskais liktiņs? Kaidus vuiceibu prīškmatus vuicejuos piļsātys školāni? Itūs i ari daudzus cytus faktus varēs izzynuot tradicionalajā Viesturis šaļteņu pīturā “Izgleiteibys īstuodis Rēzeknē 1920–1940”.

Īīšona muzeja pīturā: pīaugušajim 1,50 eiro, školānim 0,80 eiro.

Karteņā: Rēzeknis piļsātys školys 20. gs. 30. godi. Karteņa nu Latgolys kulturviesturis muzeja kruojuma

Komentari slāgti.