“Kolnasātys” intervejā jauns i uzjiemeigs cylvāks nu Ludzys – Ervīns Gorelovs. Jam ruodīs, ka mes tik dūmojam, ka asam zaļuokuo vaļsts, nu nadoram nikuo, kab tys tai patīsai byutu. Ervīns Gorelovs vuicuos arhitekturu, doncoj i vuica latino dejis i kūpā ar dūmubīdrim veidoj vysaidus projektus, kurūs cylvākim atguodynoj par vidis aizsardzeibu, tymā skaitā – atkrytumu škiruošonu i plastmasa puorstruodi. Par Ludzu, Reigā dzeivojūt, nav aizmierss. Tei asūt vīta, par kurū jis ir atbiļdeigs. Projektā “Radām novadam” tī īreikuota laivu nūma, vēļ prīškā ir veikparks.

Kas nūtiks ar Kalkunu apryupis centru, kurū Lobkluojeibys ministreja īrūsynuojuse slēgt. Piec dzeivuotuoju i pošvaļdeibys puorstuovu ībiļdem, kai ari leluos rezonaņsis medejūs, lobkluojeibys ministrs Juoņs Reirs Latvejis Radejā izasacejs, ka tys tok varātu i nanūtikt. Tok – kaidi ir nūteikumi, kurī juoizpylda Kalkunim, kurūs dzeivoj bārni i pīaugušī ar smogim goreigim i funkcionalim trauciejumim, tys eistyn nav skaidrys, ari socialuos apryupis centrā “Latgale” nivīns vēļ nazyna, kas nūtiks.