Jaunī latgalīšu horoskopi 2017. godam

LaKuGa 11. Janvars, 2017. gods Comments Off on Jaunī latgalīšu horoskopi 2017. godam

Kaids 2017. gods sūluos byut latgalīšim? Atbiļdis meklej jaunajūs latgalīšu horoskopūs!

Puorpublicejūt horoskopus, atsauce iz LaKuGu obligata!

Vucyns

Piec dobys pryncipiali cylvāki i dusmēs var ībaksteit ar rogim, nu ilgi nasasyrda i mudri pīdūd. Daudz diskutēs – raksteit “ō” ci “uo”, nu goda beiguos paliks mīreigi, partū ka saprass, ka raksteibā pīļaunami obeji varianti. Cīši pateik latgalīšu muzyka, eipaši šlagers, nu tī, kas naļūbej šlagera, klausuos alternativū i smogū latgalīšu muzyku. Ari pošim skaneigi bolsi, drūsmeiguokī dzīd korūs, kautreiguokī sasašveikst bazneicā miša laikā.

Vierss

Apsvērs dūmys par dorba maiņu, vajadzātu izavēlēt taidu, kas saisteits ar rogim ci pīnu, var pasainteresēt par vakancem AS “Latgales piens”. Jaunys dzeivis atzinis dabuos, skaitūt Raibuo stuostu gruomotu “Zalta tesmini”. Cīši apzineigi cylvāki ar gribiešonu īsavuiceit jaunys lītys, tī, kas vēļ narunoj latgaliski, kuorteigai vuiceisīs latgalīšu volūdu. Nūdereigs paleigs byus gruomotys “Skreineite. Vuicūs laseit” i “Skreineite. Vuicūs raksteit”. Nu tī, kam gruomotys na cīš īt pi sirds, vērsīs latgalīšu volūdys apvuiceibu video.

Dveini

Pretrunu pylni cylvāki, bet nūdūmi vysod lobi. Naļūbej vērtīs stuņdinīkā i atsarūn laika plyudumā, partū dzeivoj piec Andryva Jūrdža “Myužeiguo kalendera”. Var stuņdem vērtīs, kai cārmyukšys brīst, i dīnom klauseitīs, kai žuburis klaudzynoj elektreibys stoba golā. Pateik labi paēst, nu napateik mozguot traukus. Eipaši ļūbej ašņa dasys i studini, pyparmātru čaju ar madu.

Viezs

Sirdī romantiki, koč iz uoru naizruoda. Eipaši veiksīs mīlesteibys dzeluos, partū vārts Vaļuka dīnā napalikt sātā i aizlaist iz balu Seiļukolnā. Nu, kam nasaveiks mīlesteibā, tam augs leli runkuli i buļbis. Pateik kustētīs i nūdereigū apvīnuot ar pateikamū, zīmā vajadzātu pogrobā puorlaseit buļbis, nu vosorā nu buļbu lokstu nūlaseit vabalis – saīs izdareit lobu dorbu i atsapyust.

Lauva

Vairums Lauvu ir cīšī goreigi cylvāki, partū daudz dūmoj par goreigumu i skaita vacuos “Katōļu Dzeivis”. Pateik ari daudz filozofēt, eipaši par tū, kai byutu, ka latgalīšim byutu sova vaļsts. Iz vysa lobuok jussīs, asūt kaidā koncertā Latgolys viestnīceibā “GORS”, nu tim, kam pruots iz taidom dzelom nasanas, patiks īsapierkt, pavysam slinkī latgalīšu gruomotys i diskus pasyuteis internetveikalā taiseitslatgola.lv.

Mārga

Reizem kautreigi ļauds, nu reizem atvārti vysam jaunam. Pateik vērtīs kinys, eipaši Juoņa Streiča, i citēt Boņuku – “Kas uotruoks zyrgs voi mašyna?” Kod palīk cīši skumeigai, pruotu veļdzej, verūtīs “Magnetafon6iku” i “Būreiti”. Pateik meiceit muolu i peiragu meikli, nasmuodej ari meikļu miniešonu.

 

Bazvyns

Nūsvārti cylvāki. Kod vajag, ir nūpītni, kod navajag, ļustej kai nagudri. Breivajuos šaļtīs aizaraun ar gruomotu skaiteišonu, eipaši pateik Franča Trasuna fabulys, nu Franci Kempu nalosa, deļtuo ka napateik juo uzskoti par Latgolys vītu Latvejā. Cytim otkon vyss preteji – kai nagudri skaita Kempu, nu Trasuna gruomotom daže nasaver viersā. Daži ir sātā sādātuoji, i jim na cīš pateik izīt cylvākūs, partū daudz laika pavoda pi teļvīzera i ir redziejuši vysus “Cytaidi latviskais” i “Sajūti Latgali” raidejumus.

Skorpions

Iz vysa lobuok atsapyust varēs, dorūt dzeraunis dorbus, puišim vajadzātu pļaut sīnu, a meitom – marinēt ogūrčus. Pateik nauda, reizem patur sev i spekulej, reizem doluos ar cytim, partū rauga pīsadaleit vysūs leluokajūs Latgolys tiergūs. Zvaignis sūluos byut eipaši lobvieleigys biznesam, i, īspiejams, izadūs tikt pi sova stenda t/c “Ūga”.

 

Suoviejs

Cylvāki ar lelom ambicejom dzeivē i politikā, sepinej reiz runuot nu Saeimys tribinis, kai tū dareja Fraņcs Trasuns. Ka tys naizadūs, tod vysmoz byut lobūs draugūs ar Juri Viļumu. Tī, kuri nadaudz pīticeiguoki, aizaraun ar latgalīšu iedīnim i dzierīnim, sīvītem vaira pateik gataveit, a veirīšim – ēst.

 

Meža uozs

Cīši leli Latgolys patrioti, partū veikalā vasalojās tikai latgaliski, ari Reigā i Līpuojā. Vysu godu daudz struoduos, kab byutu, par kū dasaceit Latgalīšu kulturys goda bolvai Boņuks 2017. Pateik ari daudz runuot, dažim ari aprunuot, var gadeitīs, ka byus vajadzeiba izastuot Latgolys televizejā ci Latgolys radejā.

 

Iudiņa veirs

Piec sovys dobys i aicynuojuma zynuotnīki, eipaši aizaraun ar Latgolys viesturis pietnīceibu, nu vuoka da vuoka puorskaitejuši Pītera Zeilis gruomotu “Latgales kultūrvēsture”. Itymā godā vajadzātu pastyprynuotu viereibu pīgrīzt 1917. goda Latgolys kongresa izpietei. Nu daļa ir taidi, kas nikuo daudz nazyna, nu pateik gudrētīs.

 

Zivs

Leli teatra fani, Latvejis Nacionaluo teatra izruodis “Latgola” i “Latgola 2” redziejuši vairuokys reizis, kluseibā cerej, ka aktīru savuorgšonys gadīnī jūs varātu izaraudzeit Ontona/Annes lūmai. Vārts apsvērt Daugovpiļs teatra abonementa nūpierkšonu. Atvalinuojumu vajadzātu pavadeit pi iudiņu, iz vysa lobuok – pi Rāznys azara.

Komentari slāgti.