Roksti latgaliski. 1. nūdarbeiba

LaKuGa 2. Februars, 2017. gods Comments Off on Roksti latgaliski. 1. nūdarbeiba

Pīduovojam vīnkuoršā tekstā raksteitus svareiguokūs latgalīšu rokstu volūdys nūsacejumus i iz tim baļsteitus aizdavumus, kab pasatrenēt raksteit latgaliski. Latgalīšu rokstu volūdys nūdarbeibys atrūnamys ari bīdreibys “Latgolys Studentu centrs” sagataveitajā pošvuiceibys materialā “Vuicīs raksteit latgaliski!”.

Pamats aizdavumim jimts nu 2007. godā LR Tīslītu ministrejis Vaļsts volūdys centra izdūtajim Latgalīšu pareizraksteibys nūsacejumim. Dorbs latgalīšu rokstu volūdys normiešonā i sakuortuošonā turpynojās, tok suokums jau ir i deļkuo nasavuiceit jau tagad?

Kūpumā materialā īkļautys ostonis nūdarbeibys, kotru nu tom veļtejūt sovom temom. Teoreju papyldynoj praktiski aizdavumi i tim pīvīnuotuos atbiļdis, kas ļaus puorbaudeit, voi teoreja ir īsavuiceita pareizi.

 

1. NŪDARBEIBA
 
Latvīšu literarū volūdu i tuos sistemu mes asam vuicejušīs školā, deļtam daudz kur vīgluokai īguoduošanai tiks dūti saleidzynuojumi ar latvīšū literarū volūdu. Gon latgalīšu rokstu volūda, gon latvīšu literaruo volūda ir radnīceigys volūdys. Kotra volūda ir sistema — leidz ar tū, pamatojūtīs iz latvīšu volūdu, var saprast ari latgalīšu rokstu volūdys sakareibys. Pīvadumam, mes vysi zinim, ka latvīšu a latgalīšu volūdā puorsamej par o. Sistema dorbojās na tikai patskaņūs, bet ari cytur.

Skanis, burti i jūs raksteiba

Latgalīšu volūdā ir gondreiž vysys taidys pošys skanis kai latvīšu volūdā i tuos apzeimoj ar burtim a, ā, b, c, č, d, e, ē, f, g, ģ, h, i, y, ī, j, k, ķ, l, ļ, m, n, ņ, o, p, r, s, š, t, u, ū, v, z, ž i burtu savīnuojumim dz, dž.

Divskaņus roksta ar burtu savīnuojumim ai, au, ei, ie, iu, yu, ou, ui, uo.
Taitod golvonuo atškireiba — burts y, ar kū apzeimoj cītu i (kai krīvu volūdā ы).
Leidzskani izrunā ir cīti voi meikstynuoti.

Svareigi!

Leidzskaņu burtus nameikstynoj, kod aiz jūs ir e, ē, i, ī voi ei, ie, iu: saule, lēkt, likt, kugis, līkt, neit, lieni, kiula, šliukt.

Ituos skanis (e, ē, i, ī, ei, ie, iu) izrunā meikstynoj leidzskani, bet rokstūs tū naruoda. Vysūs cytūs gadīņūs, kod leidzskaņs runā ir meiksts i aiz jūs nav itūs skaņu (e, ē, i, ī, ei, ie, iu), roksta meikstū leidzskani: ļaut, ņaudēt, kuģa, ceļt, rūtaļa, bruoļs (bet bruoli), akmiņs (bet akmini), viļņs (bet viļni).

Taipat kai latvīšu volūdā, arī latgalīšu volūdā ir šaurais i plotais e, ē. Tikai latgalīšu rokstu volūdā plotū e bīži viņ jauc ar a. Zeme, zama, zjamja, zemja, zjame?

 

Kurs variants ir eistais? Kai saprast, kū raksteit?

Pyrmkuort, itūs skaņu izruna atsaškir. Pasoki skali latgaliski — “Zeme ir zemāk”. Vuordā “zamuok” (zemāk) ir teirs a, bet vuordā zeme — dreižuok cīši plots e. Taitod roksti e — zeme.

Ka labi zyni latvīšu literaruos volūdys izrunu, paleigā var īt latvīšu i latgalīšu skaņu puormaiņu zynuošonys.

Zinim, ka latvīšu plotais e latgalīšu volūdā puorsamej par a: ezers – azars, tēvs – tāvs.

Ka ir švuorbys, kaidu burtu raksteit, padūmoj, kaids e tymā pošā vuordā ir latvīšu volūdā. Ka plots, roksti a, ka šaurs — roksti e: egle, svece, es, depe (‘ķepa’).

Taipat ari var paleidzēt tys, kas jau īprīkš raksteits — e, ē (ari i, ī, ie, ei, iu) meikstynoj leidzskaņus, kas ir pyrma jūs. Vuordā zeme gon skaņa z, gon m teik izrunuota meikstai. Taitod tī “dorbojās” meikstynuotuojs e, kurs ari juonūruoda rokstūt.

Svareigi!

Nameikstynoj leidzskaņus ar burta j paleidzeibu — tū jau ir izdarejuši meikstynuoji patskani e, ē, i, ī, ei, ie, iu. Taitod napareizi: zjamja, svjacja, mjasj, dvjāsjaļa. Pareizi: zeme, svece, mes, dvēsele.

Atškireibā nu latvīšu literaruos volūdys latgalīšu rokstu volūdā rokstūs škir divskani uo i patskani o. Muola mola — ‘māla mala’.

(Pīļaunama ari divskaņa apzeimuošona ar ō, kai tai saucamajā vacajā raksteibā.)

 

Puorbaudi sevi!

Atzeimoj pareizū variantu!

Orā ir snīgs.
Uorā ir snīgs.
Uorā ir sņīgs.
Orā ir sņīgs.

Bruoļi kurynoj pļitu.
Bruoli kurynoj pļitu.
Bruoli kurynoj plitu.
Bruoļi kurynoj plitu.

Kuojis pošys ness iz sātu.
Kuojis pošys ņess iz sātu.
Kuojis pošys ņass iz sātu.
Kojis pošys ņess iz sātu.

Mes caļsimēs iz dorbu.
Mes celsimēs iz dorbu.
Mas ceļsimjās iz dorbu.
Mes ceļsimēs iz dorbu.

Eņgeļs radz eņģeli.
Engeļs radz engeli.
Eņģeļs radz eņģeļi.
Eņgeļs radz eņgeli.

Napļās agļis skujis.
Naplēs eglis skujis.
Naplēs egļis skujis.
Napļās aglis skujis.

Puorejuos nūdarbeibys meklej pošvuiceibys materialā Vuicīs raksteit latgaliski!, aizdavumu atbiļdis atrūnamys ite.

Komentari slāgti.