Pārnejuo goda Rēzeknis nūvoda veiksmeiguokajim uzjiemiejim 19. martā Latgolys viestnīceibā GORS tiks padūtys bolvys vysaiduos nominacejuos. Raidejums “Pi myusim Latgolā” sateik puors nu potencialūs bolvys sajiemieju. Taipoš raidejumā vareiba sasatikt ar aktivuokajim Rēzeknis pusis skriejiejim, kab dazynuotu, kai jim veicās, gatavejūt pusmaratonam “Skrien, Latvija”.

Jau pīktū godu piec kuortys Rēzeknis nūvoda pošvaļdeiba reikoj konkursu “Rēzeknes novada uzņēmums”. Itūreiz konkursam tyka dasaceiti i izvārtāti 26 pretendenti deveņuos nominacejuos. Itūgod nominacejis papyldynuotys, izveiduota jauna nominaceja – “Gada ģimenes uzņēmums”.

Vīns nu nominantu ir veterinarais centrys “AnRIVet”, kas atsarūn Rēzeknē, preteimā Zaļajai sinagogai. Rita Gabrusāne – Bogdanova kūpā ar muoti Annu uorstej sātys lūpus i dzeivinīkus jau nu 2012. goda. Taipoš tī teik pīduovuoti ari dzeivinīku vīsneicys pakolpuojumi.

Rēzeknis nūvoda Leņdžūs uobeļus, bumbīrus i duorzeņus jau trešajā paaudzē audzej Dmitrijs Pavlovs. Zemnīku saimisteiba “Ķirši” ir izvierzeita vīnā nu vysvaira puorstuovātajom nominacejom – “Gada uzņēmums”.

Eksporta nūlyukūs natuoli nu Rēzeknis, Veremu pogostā, uzjāmumā “IRBIS tehnology” teik ražuota elektrotehniskuo produkceja. Itys uzjāmums var lepuotīs i ar kvalitati, i investiceju apjūmu.

Sovpus pošā Rēzeknis piļsātā jau sastū godu piec kuortys nūtiks BIGBANK “Skrien Latvija” pusmaratons. Paradzams, ka skrīšonys pasuokumā dasadaleis vaira par 3000 dalinīku. Potencialajim skriejiejim kūpeigi treneni paradzāti kotru trešdīnis vokoru. Pyrmajā kūpeigajā treneņā dasadaleja ari vīglatlete Gunta Latiševa-Čudare.