Jelgovā reit atkluos Osvalda Zvejsalnieka izstuodi

LaKuGa 16. Marts, 2017. gods 0

Jelgovys Sv. Treisvīneibys bazneicys tūrnī nu 17. marta da 11. maja byus apsaverama Osvalda Zvejsalnieka gleznu izstuode “Baltās baznīcas un Spānija”, informej Jelgovys regionalais turisma centrys. 17.martā 17.00 paradzāta izstuodis atkluošona i sasatikšona ar muokslinīku.

“Baltās baznīcas un Spānija” tai Osvalds Zvejsalnieks nūsaucs sovu gleznu izstuodi Jelgovā, kas nu 17. marta apsaverama Jelgovys Svātuos Treisvīneibys bazneicys tūrnī. Muokslinīka daiļradi raksturoj i klusuos dobys, i sadzeivis žanra dorbi, ari portreti, tok vyspiļneiguok Osvalds Zvejsalnieks sevi izsoka ainovuos, izstuodis dorbūs jis izavieliejs īmyužynuot saulainuos Spānejis ainovys.

Ari gleznojūt svešys zemis, kai itūreiz, Osvalds Zvejsalnieks palīk Latgolys muokslinīks. Te jis ir dzims, beidzs vydsškolu, muokslys izgleiteibu vys sajiems Reigā, tok iz reizis atsagrīzs Rēzeknē. Piec Muokslys akademejis beigšonys jis sovu rūkrokstu i naatkuortojamū pasauļa redziejumu sajēme, kod dasavērse Latgolys temai. Kruosu ziņā Osvalda Zvejsalnieka dorbi ir atškireigi nu puorejuos latvīšu gleznīceibys ar tai rakstureigū tonalū izsmalcynuoteibu. Muokslinīka kruosys 21. godu symtā palykušys kūšuokys, kontrastainuokys, ūtys trīpīņs iz audakla īkšeji spiejuoks, energiskuoks. Kruosu izvielē i pīlītuojumā atsakluoj juo vitalitate, dzeivisprīca i harmoniskuo pasauļa saprasšona.